The Joomak (已結業)

同老友相約係尖沙咀食飯，我地就揀左係海港城食韓國餐，最估唔到係我地坐既位置竟然可以望到維多利亞港景色，雖然唔係坐貼住窗邊既位置，但景觀都幾好呀～～而且食物唔算貴，同朋友都食得好開心！ 紅梅4度冷麵 $98 紅梅有3款可以揀，我地就揀左韓式辣豬肉！另有岩素食者食既素菜冷麵～ 冷麵用乾冰呈上，所以一上桌就仙氣彌漫，即刻感到透心涼～ 倒上柚子汁，再加自己喜歡既配料，配料有泡菜、水梨、青瓜同糖心蛋，仲可以加好多紫菜。 我覺得整個冷麵既份量唔算多，但食起上黎非常清新，而且清甜既水梨亦都豐富左口感～韓式松子仁吞拿魚飯卷 $88 大約有10件左右，飯卷口感唔鬆散，飯粒調味亦都好足夠！ 酥炸芝士魷魚筒 $68 魷魚筒一共有4件，覺得小貴呢，但就炸得香口！ 但口感比我相像中有差距，首先一放耐左少少，芝士就好容易結埋一舊，而且因為魷魚比較有咬口，食起上黎就變左魷魚還魷魚，芝士還芝士～～ 青檸牛油果麻藥炸雞 $138 炸雞份量有好多，有10件細細件炸雞左右，我地好似食極都食唔完咁，比較岩一大班食～～炸雞好嫩滑，淨係食到一件比較鞋口。 青檸味比牛油果味特出，醬汁好開胃同惹味，令人好想繼續食～