今年既生日飯選擇係四季酒店既Caprice慶祝🥳 提早一個月就訂好位。無論係環境﹑服務﹑食物質素都係水準之上，不愧為連續多年獲米芝蓮星級既餐廳，仲要係3星⭐️⭐️⭐️ 令人回味悠長！Caprice門面設計相當低調，穿過走廊會見到無盡既落地玻璃窗，空間感十足，將維港對岸景色盡收眼簾😍 餐廳內樓底高挑，歐陸風裝潢﹑水晶吊燈，流露出非凡氣派。Set lunch價錢頗親民，人均$1,098已經食到5-courses，比起4-courses $988多一道魚，抵食好多✅！當中有d特別菜式或加魚子醬需要額外收費，豐儉由人。🥖𝑩𝒓𝒆𝒂𝒅
點好菜後，店員端上一籃子每日新鮮焗製既麵包，可以根據自己喜好揀口感偏軟或硬既麵包。值得一讚既係麵包都係暖暖地既，保持溫熱口感。我試左兩款軟身麵包都覺得好鬆軟，真係唔錯！另外店員會送上兩款牛油，原味同鹹味，搽落麵包到更加滋味。🍽𝑨𝒎𝒖𝒔𝒆-𝑩𝒐𝒖𝒄𝒉𝒆
法國菜精髓，開始用餐前先試一道由廚師發辦既餐前點心。今次係一道紅菜頭帶子莎莎，加以魚子醬點綴。大廚用紅菜頭整成兩片好薄既皮，中間夾住帶子莎莎，口感豐富，頗為醒胃既一道餐前小食。𝑨𝒑𝒑𝒆𝒕𝒊𝒛𝒆𝒓
♢ 🦞𝑳𝒐𝒃𝒔𝒕𝒆𝒓 𝒘𝒊𝒕𝒉 𝑴𝒖𝒔𝒉𝒓𝒐𝒐𝒎 𝑩𝒂𝒗𝒂𝒓𝒐𝒊𝒔 𝒂𝒏𝒅 𝑨𝒏𝒊𝒔𝒆 𝑭𝒍𝒂𝒗𝒐𝒓
龍蝦伴蘑菇奶凍及八角 ‧ 龍蝦已經切成片狀，擺放到好似一朵花咁，非常精緻。試過原味後，可以試下點蘑菇同八角整成既奶凍，香氣濃郁。♢ 🦀𝑨𝒍𝒂𝒔𝒌𝒂 𝑲𝒊𝒏𝒈 𝑪𝒓𝒂𝒃, 𝑪𝒓𝒖𝒔𝒕𝒂𝒄𝒆𝒂𝒏 𝑱𝒆𝒍𝒍𝒚, 𝑮𝒊𝒍𝒍𝒂𝒓𝒅𝒆𝒂𝒖 𝑶𝒚𝒔𝒕𝒆𝒓 𝒂𝒏𝒅 𝑶𝒔𝒄𝒊𝒆𝒕𝒓𝒆 𝑷𝒓𝒆𝒔𝒕𝒊𝒈𝒆 𝑪𝒂𝒗𝒊𝒂𝒓 (+$𝟔𝟓𝟎)
阿拉斯加蟹肉伴海鮮啫喱及法國生蠔配特級魚子醬 ‧ 餐廳招牌之一，加錢都值得！首先擺盤已經好吸睛，用左螃蟹造型既碗裝住美食，好有心思。海量魚子醬底下係蟹肉絲﹑金箔，同埋整成啫哩狀既生蠔，鮮味十足，呢個搭配毫無違和感，每口都好滿足！𝑺𝒐𝒖𝒑
♢ 🦆𝑫𝒖𝒄𝒌 𝑪𝒐𝒏𝒔𝒐𝒎𝒎𝒆 𝑾𝒊𝒕𝒉 𝑭𝒐𝒊𝒆 𝑮𝒓𝒂𝒔 𝑹𝒂𝒗𝒊𝒐𝒍𝒊
鴨肉清湯配鴨肝雲吞 ‧ 店員即席倒湯，保持溫熱，儀式感滿分。或者係過於真材實料，鴨湯整體味道比較重，過於濃郁，不過鴨香十足，喜歡重口味既人或者會鍾意呢個湯。碗中仲有3件鴨肝雲吞，皮薄餡靚，入口係濃郁軟腍既鴨肝味道，十分滋味。𝑭𝒊𝒔𝒉
♢ 🎣𝑫𝒂𝒊𝒍𝒚 𝑾𝒊𝒍𝒅 𝑪𝒂𝒖𝒈𝒉𝒕 𝑭𝒊𝒔𝒉 𝑴𝒊𝒍𝒍𝒆𝒇𝒆𝒖𝒊𝒍𝒍𝒆 𝑾𝒊𝒕𝒉 𝑳𝒆𝒆𝒌 𝑨𝒏𝒅 𝑷𝒐𝒕𝒂𝒕𝒐, 𝑴𝒊𝒙 𝑯𝒆𝒓𝒃𝒔 𝑺𝒂𝒖𝒄𝒆
時令鮮魚伴千層大蔥馬鈴薯配香草汁 ‧ 成個presentation好似一件cake咁靚，賞心悅目。當日用左多寶魚，魚肉滑嫩，配上薯仔片﹑韭葱同香草汁，味道剛好，唔會蓋過魚肉既鮮嫩味道。♢ 🍾𝑭𝒊𝒔𝒉 𝑸𝒖𝒆𝒏𝒆𝒍𝒍𝒆𝒔 𝑾𝒊𝒕𝒉 𝑺𝒉𝒆𝒍𝒍𝒇𝒊𝒔𝒉 𝑨𝒏𝒅 𝑪𝒉𝒂𝒎𝒑𝒂𝒈𝒏𝒆 𝑺𝒂𝒖𝒄𝒆
法式魚肉慕絲伴海鮮配香檳汁 ‧ 魚肉慕絲整成橢圓形，size剛好可以一啖放落口~ 質感好柔軟，魚味濃郁得黎又唔會有腥味，而且唔會覺得太膩。最正係個香檳汁，為慕絲增添酒香，啖啖都係滿足感。𝑴𝒆𝒂𝒕
♢ 🐓𝑺𝒍𝒐𝒘 𝑪𝒐𝒐𝒌𝒆𝒅 𝒀𝒆𝒍𝒍𝒐𝒘 𝑪𝒉𝒊𝒄𝒌𝒆𝒏 𝑹𝒐𝒍𝒍 𝑾𝒊𝒕𝒉 𝑪𝒆𝒍𝒆𝒓𝒊𝒂𝒄, 𝑨𝒍𝒃𝒖𝒇𝒆𝒓𝒂 𝑺𝒂𝒖𝒄𝒆
慢煮黃油雞卷伴芹菜配奶油汁 ‧ 大廚好用心咁將雞切成片狀，然後包成圓形，賣相有驚喜~ 黃油雞出名肉質香甜，入口好滑嫩，而奶油汁香氣十足，芳香濃郁。♢ 🥩𝑩𝒆𝒆𝒇 𝑪𝒉𝒆𝒆𝒌 𝑾𝒊𝒕𝒉 𝑴𝒖𝒔𝒉𝒓𝒐𝒐𝒎 𝑨𝒏𝒅 𝑷𝒐𝒕𝒂𝒕𝒐 𝑷𝒂𝒏𝒊𝒔𝒔𝒆
牛臉頰伴蘑菇及香脆薯塊配紅酒肉汁 ‧ 好耐都無食過肉質咁軟腍既牛臉頰肉，彷彿入口即溶咁，完全唔洗費勁去咬，點埋紅酒汁更加香，非常出色！配菜蘑菇同樣好味，碟邊仲整左一粒粒既蘑菇醬，別緻又用心。𝑫𝒆𝒔𝒔𝒆𝒓𝒕𝒔
♢ 🧁𝑴𝒐𝒏𝒕 𝑩𝒍𝒂𝒏𝒄 𝒂𝒏𝒅 𝑴𝒂𝒏𝒅𝒂𝒓𝒊𝒏, 𝑽𝒂𝒏𝒊𝒍𝒍𝒂 𝑰𝒄𝒆 𝑪𝒓𝒆𝒂𝒎
法式栗子蛋糕伴橘子配雲呢嗱雪糕 ‧ 男朋友準備既生日驚喜，碟邊既英文字寫得好靚！店員大推呢個甜品，栗子蓉質感好綿滑，入面有橘子粒粒，可以中和栗子既膩，口感更清新。♢ 🍫𝑪𝒉𝒐𝒄𝒐𝒍𝒂𝒕𝒆 𝑺𝒐𝒖𝒇𝒇𝒍é, 𝑽𝒂𝒏𝒊𝒍𝒍𝒂 𝑰𝒄𝒆 𝑪𝒓𝒆𝒂𝒎 (+$𝟏𝟓𝟎)
朱古力梳乎厘 ‧ 男朋友形容為非常出色既梳乎厘！店員教我地係梳乎厘上面開個窿，然後放雪糕入去，將梳乎厘同雪糕一齊食，冷熱交融口感非常正~ 而且梳乎厘夠鬆軟，充滿空氣感，朱古力味非常濃郁，每啖都好滋味！🍬𝑭𝒓𝒆𝒆 𝑺𝒏𝒂𝒄𝒌
♢ 𝑷𝒆𝒕𝒊𝒕 𝑭𝒐𝒖𝒓
食左咁多野，估唔到最後仲有甜品送~ 3款精美甜點擺放係皮盒上，優雅高貴。建議由梨撻食起，味道酸甜，清新怡人。中間係牛奶朱古力，仲印上Caprice招牌，別具特色。最後係棉花糖朱古力脆脆，棉花糖上有燒焦香味，軟腍腍口感加上朱古力脆脆，好有層次感！☕️𝑻𝒆𝒂 𝑶𝒓 𝑪𝒐𝒇𝒇𝒆𝒆
♢ 𝑪𝒐𝒇𝒇𝒆𝒆 ‧ 可以按喜好自己加奶同糖，味道正常。
♢ 𝑭𝒐𝒖𝒓 𝑺𝒆𝒂𝒔𝒐𝒏 𝑯𝒐𝒖𝒔𝒆 𝑻𝒆𝒂 ‧ 帶茉莉花加薰衣草香氣，散發芳香，茶味唔會過濃，幾有驚喜！店員仲會過黎續杯添~🥂𝑫𝒓𝒊𝒏𝒌𝒔
♢ 𝑹𝒐𝒔𝒆 $𝟏𝟓𝟖
ɢʀᴀᴘᴇꜰʀᴜɪᴛ | ʀᴏꜱᴇ | ʟɪᴍᴇ
店員推薦呢杯cocktail，粉紅色賣相好岩打卡。面層灑上玫瑰粉，入口係清新西柚同酸橙味道，唔會過酸。

♢ 𝑪𝒂𝒇𝒆 𝑪𝒂𝒍𝒗𝒂 $𝟐𝟓𝟎
ᴛʀɪᴇᴅ & ᴛʀᴜᴇ ᴠᴏᴅᴋᴀ ɪɴꜰᴜꜱᴇᴅ ᴠᴀɴɪʟʟᴀ | ᴛᴏɴᴋᴀ | ᴍʀ ʙʟᴀɴᴋ | ᴄᴀʟᴠᴀᴅᴏꜱ ᴍɪᴄʜᴇʟ ʜᴜᴀʀᴅ 20 ʏᴇᴀʀꜱ
男朋友點左呢杯mocktail，杯上有塊好薄既朱古力，幾脆口。飲品帶有濃烈既Vodka加咖啡香味，幾有特色。店員服務好細心，仔細介紹每一道菜式，不過我同其他食過caprice既朋友都覺得佢地講野太官腔，有D似錄音機咁對答，如果表現更加自然會更好。另外店員都好熱心幫我們影相，識搵角度，加分💯


整體黎講，環境同食物都好滿意，每道菜式既配菜﹑醬汁都絕不馬虎，盡顯大廚創意同心思👍🏻 人均唔洗2千就食到米芝蓮3星法國fine dining，絕對物超所值✅

人總是那麼犯賤，總是要失去了，或者快將失去了，才會特別珍惜即將失去的，人也是，食店也如是。我說的是「富記粥品」，這間在旺角花園街經營多年的老店，屹立九龍鬧市數十載，是童年時在這附近居住的我，家人偶爾會和我去吃東西的地方。長大後，雖然仍然經常在旺角區內出沒，但早已成家立室的我，就鮮少再來這裡幫襯了。近日偶爾知道這間有名老店將會在三月底結束營業，不禁讓我大感驚訝。雖然自從肺炎疫情肆虐香港，香港飲食業度過了一個長達三年的寒冬，不少有名食店都先後宣佈結業，但「富記」這間在區內屹立多年不倒的老店，竟然也會有這麼一天，實在令我大感可惜。畢竟，這是我的童年回憶之一，昔日的「煊記」沒有了；「五月花」沒有了；「神燈」雖仍在，，現在就連「富記」......也沒有了。這一夜，晚上七時多才來到「富記」的我，赫然見到佔據左右兩個舖位的「富記」門外分別排了兩條一長一短的人龍，長的大約有十數人，短的也有六七個人，比未有結業消息傳出來之前生意明顯好了，我想，好像我一樣聞風而至的客人相信不在少數。也不是等得太久，大概等了十分鐘左右吧，我已被安排入座，看著全場滿座的店舖，老女老幼在簡樸但懷舊的環境下用膳，我心想，為甚麼好端端的一間老字號，曾與香港人一起度過了不少風風雨雨，高高低低，怎麼竟會在這個艱難時刻被打倒了呢！也罷，縱使這一刻被風雨打倒，只要有心，總有一天，一定可以東山再起的。本想叫個燒鵝例牌，配一碟「乾炒牛河」（$58）做晚餐，原來這夜我來得不夠早，燒鵝已經沽清，見對面搭檯的男人叫了一碟「時菜炒及第」，忽然想到也好，就來一碟「時菜炒及第」（$85）伴牛河，做我的晚餐好了。「乾炒牛河」是這裡的招牌菜之一，當然要回味一番，要另加兩元另上的橙黃色太極圖芥辣也是吃乾牛河必備之物，要是沒有了它，就如畫龍沒有點睛，砌圖缺了一塊一樣，肯定是一個遺憾。「乾炒牛河」比「時菜炒及第」先行送上，這牛河滿有鑊氣，牛肉份量甚多，河粉也幾乎全部都均勻地沾上了醬油，加上少許的芽菜仔，味道的確不錯，也許這河粉稍為油了一點，炒得不算非常乾身，間中有一兩片牛肉有丁點兒梳打粉的味道，但瑕不掩瑜，這碟「乾炒牛河」仍能讓我感到滿意。特別是蘸上少許芥辣在河粉上之後，味道更好。「時菜炒及第」的時菜其實是正氣的菜心，份量極多，把這菜式的罪惡感減輕不少。這道菜的罪惡感當然是從及第而來，切得細碎的豬膶、豬腰、豬肚與豬粉腸，混雜在泛著油光的嫩綠菜心中，是我久沒嚐過的風味。及第粥吃得多，炒及第卻絕無僅有地不知多少年才吃一遭，當然特別讓我覺得珍貴，即使豬膶只是薄切，經爆炒後會較乾，最矜貴的豬腰也較少，我仍然覺得這道邪惡得來又不算十分邪惡的小炒沒有叫錯，值得回味。這夜幫襯，只得我一個人，吃得當然不多，好些我想吃的東西，好像「燒鵝粥」、「薑蔥魚腩」、「白灼腰膶」以至簡單的湯飯，我都沒吃。現在才三月初，這裡還會經營到三月底，希望到時候這裡不會人潮不斷，一位難求吧！那麼我還可以多來一兩趟，還可以回憶一下昔日的美味吧！

星期六下午到了W香港酒店享用侘寂之美下午茶，$728及加一服務費，兩位用 。侘寂的大致意思是簡陋樸素的優雅之美。

在等待食物期間，先欣賞這裡的環境。餐廳裝修有型格，位於角位，可享180度開揚的西九及維港景色，視野廣闊，光線充足。





不一會兒，下午茶送來了。


鹹甜點包括：
日式磯煮鮑魚配昆布啫喱
鮑魚泛起光澤，質感爽口，昆布啫喱滑溜很有趣。

蟹肉銀杏冷茶碗蒸
一梳梳的蟹肉🦀，充滿鮮味，觸動味蕾，蒸蛋滑不溜口。

豆腐皮卷海膽醬蝦肉沙律
豆腐皮卷爽脆，內裡海膽醬充滿鹹香，蝦肉軟腍。

紫蘇燒雞絲沙律甜包 麵包🥯呈粉紅色，賣相迷人，雞肉切成一絲絲，很有香氣。

鮟魚康魚肝慕絲批配蜜餞柚子
魚肝味散發陣陣濃郁的魚油香，同時混了清甜的柚子，兩種味道互相交融，十分特別。

焙茶果仁慕絲蛋糕🍰
表面輕放了一小片金箔，令賣相更名貴。焙茶味香醇，帶點芳香，果仁慕絲綿滑可口，加上鬆脆的餅底，我十分欣賞這個甜品。

北海道黃豆奶凍
味道有點像豆腐，濃郁之餘亦感到清新，面層的木槺碎增添了口感。

甜薯芝士蛋糕🍰
整件甜品呈紫色，應該吸引不少女生。它散發甜美的紫薯味，芝士不算太飽滯。

摩卡提拉米蘇
有很香濃的Mocca咖啡味，忌廉細嫰軟滑，撻身牛油味香濃。

英式鬆餅配自家製櫻花🌸白桃果醬
鬆餅有濃濃的牛油鹽香，口感軟綿亦稍為黏口，切開亦不會有太多餅碎，內裡有一粒粒提子乾🍇，是十分傳統的做法。除了香滑的奶油外，還有首次吃鬆餅時遇見的白桃果醬，甜美而感覺新鮮。

草莓拿破崙
拿破崙香脆而充滿牛油香，夾雜了忌廉以及甜美的草莓🍓，是一種享受。

我點了熱咖啡☕️作餐飲，心形🧡拉花圖案精緻，不捨得把它弄破呢。

服務方面，店員們熱情有禮，令我們感到賓至如歸。😊

呢間餐廳係我八年來最喜愛嘅餐廳。係一間米之蓮三星高級法國餐廳。基本上每年生日/ 重要節日我哋都會去呢度。今年情人節都唔例外。因為工作關係，我哋將慶祝情人節延遲左一個星期。 餐廳裝修屬於高格調。設有吧枱位置及用餐雅座。吧枱位置可以望入廚房廚師烹調食物嘅過程。我哋比較喜歡坐吧枱用餐。 入座後，餐廳會送上一籃新鮮焗製嘅唔同種類法式小麵包。例如牛角包、法式酸種、芝士麵包、煙肉麵包等等。 今日我哋兩位就點餐廳Signature Menu - 六道菜晚餐。分別點左紅酒同埋一杯bloody orange cocktail 。之後送上主廚精心安排welcome course。 第一道：Le Caviar Imperial de Sologne (Sologne Imperial caviar with fine jelly and cauliflower cream) 底層由法國魚子醬做成啫喱再配上面層係由椰菜花做成忌廉。呢個配搭好新鮮！好多時食魚子醬都偏咸，呢個完全唔會。食到淡淡海水味！魚子啫喱鮮甜唔腥。 第二道：La Langoustine (Langoustine ravioli with lobster coral sauce and green peas)簡單來講就係海螯蝦餛飩配龍蝦珊瑚醬和青豆。海螯蝦屬於其中一種龍蝦品種，又稱小龍蝦。餛飩裡面混有龍蝦肉同帕馬森芝士，而個汁做到好似泡沫咁。食落去好輕盈唔覺得好heavy。 第三道：Le Zéphyr au Fromage (Smooth Emmental cheese soufflé with black truffle coulis）嗱嗱嗱! 呢個好特別呀! 係用Emmental 芝士做成疏乎厘配黑松露汁。平時食疏乎厘都係甜，估唔到放芝士入去疏乎厘都幾好味，質地好似食緊好light 嘅芝士蛋糕。又有濃厚黑松露汁 Emmental 芝士香真係好夾。鍾意食黑松露同芝士朋友一定要試。 第四道：Le Homard Roasted Maine lobster with baby spinach and “béarnaise” sauce 終於到我最鍾意食嘅龍蝦出場，起左成條龍蝦尾上碟配嫩菠菜和蛋黃醬 。龍蝦肉好彈牙爽口，配埋特製蛋黃醬帶出龍蝦肉鮮甜👍🏻 話咁快就食第五道菜，再追加多一杯Cocktail 。食左幾道菜都係海鮮嘅菜式，係時候食返啲肉 第五道: La Caille (Free-range quail and foie gras with seasonal wild mushrooms ) Le Bœuf Wagyu (Grilled A4 Kagoshima Wagyu beef with French beans and mustard sauce) 我哋兩個分別每人點一道。 我嘅主菜就係鵪鶉和鵝肝配時令野生蘑菇，而男朋友就係烤A4鹿兒島和牛四季豆芥末醬。講下鵪鶉同鵝肝，我食鵝肝嘅時候最初以為食緊鵪鶉，係肉嘅感覺。後來經理講解先知道原來係將件鵝肝慢煮再煎，平時食係滑嘅口感，估唔到可以煮到咁特別嘅口感。當然好好味😋 而A4鹿兒島和牛四季豆芥末醬，呢款和牛嘅脂肪分布平均但唔算多。煎到和牛表面少少脆，保留左大量肉汁，口感似返牛扒。平時食開和牛脂肪含量多，食落口好多油咁，我反而幾鍾意呢種和牛，完全唔油膩。 第六道： La Forêt Noire (Mushroom in Black forest style with griottine and chocolate cream flavored with kirsch) 黑森林風格嘅蘑菇配用櫻桃酒調味嘅牛古力奶油。本人非常欣賞呢個甜品，將黑森林蛋糕做成蘑菇形態做得好靚，朱古力配上榛子慕絲，底部有餅乾crumbs 同埋朱古力奶油味道好有層次。 今次Fine Dine體驗一如以往質素，每一道都好有水準，我比足滿分。真係好好味好滿足！三星米之蓮名銜實至名歸，所以每年都要返黎食一次。

香港大學站附近竟然有間埃及菜？都係第一次試😲 有lunch set ($120)，包主菜、麵包/飯、飲品、甜品，主菜選擇十分之多 (多種肉類以及製作方法，素食都有) 望住啲名完全唔識讀，好彩有中英文解釋每道餸係咩嚟 ▶️ Shish Taouk 中東青椒雞肉串 兩條串燒大概有六件雞肉，中間夾雜着啲三色椒🫑、紫洋蔥🧅 旁邊配上沙律菜，同埋自選配菜 🐔雞肉烤得鮮嫩多汁，仲有少少燒焦咗脆卜卜嘅位，微微調咗味 烤三色椒、紫洋蔥食落唔苦唔辣，味道「濃烈」且偏甜，同雞肉作對比 旁邊有醬料，一開始以為係千島醬😂顏色近似，但食落係苦苦地嘅，口感上偏稀同埋有粒粒粉狀嘅物體 問咗侍應先知原來係中東芝麻醬 (tahini sauce)，製作過程將白芝麻粒磨到勁幼細，聽講營養價值好高 (豐富蛋白質同鈣質等)💪🏻 沙律菜係生菜配青瓜片，上面落咗少少沙律醬，味道正正常常🥬 ▶️ Cous cous 古斯米 唔係第一次食，之前起英國寄宿學校有試過，之後都試過返屋企自己煮 今次見餐牌有，頓時有種「情懷」🙈 口感有驚喜😲細細粒沙狀而每粒小米粒粒分明，間唔時有啲會黐埋一舊令口感好得意，比預期中更有質感 味道上鹹鹹地，唔知點解食到啲Parmasen芝士味😂係一種令人一試難忘嘅味道，比起之前食過嘅更好味 (因為之前嗰啲通常無調味，直接煲熟就食) 超推介大家揀呢個做配菜！ ▶️ Hummus 鷹嘴豆泥 (+$40) 鷹嘴豆就食得多，算係豆類偏硬嘅一種 Hummus就係攪拌咗嘅鷹嘴豆，變成糊仔質感 食落已經冇咗鷹嘴豆本身嘅味道，反而食到好香嘅香草/香料味🌿 面頭落左少許橄欖油，令佢冇咁乾 會配埋一塊彼得包 (pita)🫓同naan分別係材料只用上麵粉、水、鹽、酵母，所以口感上比較粗糙偏硬 的確呢個食落完全唔煙韌，厚度好似對接左嘅紙咁，少少脆卜卜，個人唔係特別鍾意 本身冇咩味道，只會食到面頭有啲粉，不過配濃味嘅鷹嘴豆食就OK嘅 ▶️ Dessert 可以揀牛奶米布丁(rice pudding) 或 開心果仁酥 (Baklava with pistachio) 見多數人都係揀米布丁😆記得自己起法國超市有買來食過 (細個幾鍾意) 當然會食到一粒粒米，比起平時食嘅白米飽滿同硬身，非常之有質感🍚 成個布丁好creamy，比起希臘乳酪杰身，同吉士有少許相似 鍾意佢奶味同雲呢拿味好香濃🥛(即刻諗起BB奶粉👶🏻)，布丁同米嘅比例啱啱好，唔會感覺好似食緊碗飯咁或稀到無料👍🏻 唯一係覺得佢偏甜，食食吓會滯，加上佢都幾飽肚吓，但絕對值得試嘅甜品！ ▶️ Iced lemon tea 冇特別要求，但完全冇加糖嘅，所以飲落冇味，好似水咁😀 - 整體食物有質素，肉類調得好入味，雖然第一次試埃及菜，但感覺幾正宗 賣相亦好唔錯，連啲碟都靚過人🍽️ 環境非常有異國風情，牆壁上印有唔少埃及人橡，格調走型格外國風 服務都超好，雖然得一個女侍應做吧同枱，但照顧周到，仍然面帶笑容好好禮貌～ 價錢雖貴啲，連加一大概$150/人，(小妹好耐冇食過呢個價位嘅lunch haha，冇收入嘅學生妹🥲），但絕對絕對值得！

是晚過左黎康怡
廣場門口個幾間都好多人排隊
見到呢間唔洗排隊,而且係新店未試過
再而個裝修真係幾揼本
再再而,個侍應好有禮貌及積極咁俾個MENU 我地睇,話套餐有85折
以上種種,都覺得可以試下

餐廳入面既空間感真係好大
淨係俾人行既空置位都好多
行出行入都好舒服,一點都唔迫

裝修設計以簡約風為主
以石屎灰色調鋪設牆身同地板
再配以一些木系既椅子
格調幾有品味

有部分既位置卡座位既天花係整到半圓形既入口,有點狀似進入洞穴既感覺
入去坐應該別有一番感覺,似與其他食客隔開咁,自成一角
下次我都想試下坐

股務方面,想特別表揚
真係好好禮貌
除左上面提到積極有禮
點餐﹑加水﹑要求更多餐具等等,侍應們既回應都好快
對答好有禮貌,必定有「唔該」﹑「唔洗客氣」等
令食客感到好舒服既一個對應

食物方面,有質素
用料新鮮有誠意
特別喜愛那個凱撒沙律

整體說,配合環境﹑服務,好滿意
價錢有85折後都幾抵食,就算正價都唔貴
一定會再回頭

Dinner set for two $528
(include salad*1 + soup *1 + main *1 +set drinks *2) 
➽蘑菇cappuccino 
夠熱,蘑菇味濃香郁
用杯盛住特別

伴湯有一小塊包
配合著食不錯➽63C 海蝦柚子汁凱撒沙律
有別於一般的凱撒沙律
多了些幾新鮮的海蝦
海蝦爽彈,不腥
而且用既汁係柚子汁
微酸開胃,不會太酸

加上有一隻溫泉蛋係上面
整穿左,配合整體,好好食
比平時出面食既凱撒沙律好食好多
口感豐富了,冇咁悶 
推薦!➽63C溫泉蛋卡邦尼
這個卡邦尼岩岩入口,會覺得味道有點不足
我同朋友都認為可以再濃郁D
不過幸好有溫泉蛋,起了畫龍點睛的效果,加了點分➽慢煮風乾火腿釀雞卷
雞肉不乾,整個卷也不會散,味道不重
一定要伴汁吃才可
整體味道OK

係嘉頓山睇完個咸蛋黃，一路漫步落返深水埗旺角方向，係正路邊就會見到呢間主打正宗越南菜，網上又多好評既小店，淺藍色招牌夠光鮮唔難搵，入去裡面望下裝修，有啲心思，牆身沿用招牌藍色營造海既感覺，燈一律用竹籃罩住看似越南漁民既帽子，如果鍾意靜靜地自己一個人食，佢有吧檯式單向比自己嘆食，感覺唔錯。

食物方面，我自己去過兩次越南慢遊，試過最地道正宗越南菜，呢度既味道適當地微調向香港人口味之餘亦維持到越南既風味，可以話帶比我回到越南既味道！


越萊經典撈檬(香茅牛肉+燒豬扒+燒豬頸肉) $66
豬扒同豬頸肉既醃料唔淨止留在外皮，個味道完全融入左肉裡面，咬落去肉質亦彈牙可口，牛肉亦有牛味，最怕食到啲肉係得醃料味冇肉既感同味道，呢個就值得推介了，至於個檬粉偏厚身，以為好少，但好快就有飽肚既感覺

河內蝦仁米紙卷(兩件)$26
新鮮蝦配合厚身米紙卷，細細啖男仔一啖可以一舊，咬落去爽口清新，屬不錯既餐前小食

西貢馬拉盞炒通菜$28
通菜出名炒出黎好多水，而呢度令佢收左水之餘仲配合左唔辣既馬拉盞去炒，有越南味道又可以換下味道，唔駛食親通菜都係撈腐乳

魷魚沙律配醒胃柚子汁$38
魷魚新鮮爽口，面頭淋左開胃既味粉類似炭燒風味，沙律底夠清新，如果喜歡柚子汁既朋友可以嗌佢多汁，成件事食呢個會令人好開胃好想食多啲野

越萊自製手工春卷(兩件)$26
出色既春卷，上枱入口仍然係熱辣辣，外皮非常脆口，內涵充足，就算青瓜同菜底都一樣新鮮唔係只用黎伴碟，我同朋友兩個人食，諗住樣樣試啲，最後只係食左一件，依家已經心掛掛想再食多兩件

越南黑咖啡(跟餐價)$6
唔同係越南飲既ICE COFFEE全部都係糖，呢度既熱齋啡既苦澀味徘徊於口腔內，會令你想慢活起來體驗，嘆下Chill下

以前係西營盤返工，間唔中會經過哩個鋪位，不過等唔切佢開張，就轉咗工囉。
今日再返到嚟西營盤，第一個目標當然係去食世一芝士蛋糕。
相信有睇前幾個post都知道，我失敗咗🤦🏻‍♀️
雖然同世一芝士蛋糕無緣🥲🥲，但係早餐始終係要食嘅😆
附近有好多新開嘅餐廳都未試過，仲有好多地方揀，今日先試吓哩間北歐風嘅咖啡店。



Fika All Day ($128)
職員推薦哩個早餐，早餐已經包括咗餐廳大部份嘅食物，亦係最熱門嘅食物。
有煙三文魚、蛋沙律、肉丸、薯蓉、沙律菜、朱古力扭扭酥同果醬。
但係當日扭扭酥已經賣哂，所以轉咗Pain au chocolat。
味道中規中矩吧，落單時冇睇清楚，以為係scrambled eggs，嚟到先知係蛋沙律🙈🙈
而且份量比想像中細，但值得一讚嘅係，個Pain au chocolat真係幾好食。



Mocha ($45)
所有咖啡都會配一片薑味許願曲奇🍪
食之前先許願，然後用食指係中間督一下，如果曲奇分開成3片，你嘅願望就會成真😌
如果係2 或者 4片 就食咗佢🤣



咖啡夠香，唔會太酸，都唔會太甜。
比較幾間喺第一街嘅咖啡店，哩間係最出色。



順帶一提，薑味許願曲奇可以買返屋企架👍🏻



總結，食物嘅味道係正常水平，但等食物實在等得太耐😵
餐廳入面人流唔多，但係都要等半個鐘😮‍💨
其實份早餐要煮嘅食物唔多，咖啡要逐杯沖，我都明白真係要啲時間。但係職員要落單、收錢、沖咖啡同執枱，真係太忙啦😵

餐廳屬半自助形式，落單之後，自己揀位，等叫號碼拎食物。 餐廳裡面有唔同嘅雜音，加上半開放式設計，外面人多車多，號碼其實都聽得唔係好清楚。
如果想問下份食物係唔係自己嘅都有難度😰
職員好專心準備緊食物同沖緊咖啡，又唔好意思打斷佢哋。
大家叫嘅食物差唔多，作為客人都驚拎錯人哋嗰份。見到另一位客人想拎多一份餐具，同樣唔知點算好⋯⋯
希望餐廳喺哩方面將來可以改善。

唔知道係咪weekend嘅關係，所以冇set。一份早餐再一杯咖啡差唔多成$180，而且份量有啲細， 略嫌貴咗啲。

📌 捌哥.捌哥特色馬拉茶啡廳 - 深水埗汝州街188號地下
🗓(18/2) 星期六 ⏰ 下午1點左右


💈特式：呢間捌哥．捌哥我已經食過好多次，係我係香港最鍾意食嘅馬拉菜之一，周不時放假都會特登走去深水埗食，每次一想食肉骨茶就會諗起佢。

🥩🍔🌭🌮🥗🥯🥘🍲🍝🍣🥟🍤🍱
食物：其實佢menu內嘅食品我大多都試過晒，但每一次食佢地都keep到水準，同埋想提下未去過嘅朋友仔，呢度d肉骨茶係可以叫店員幫你refill的，我每次都起碼飲佢兩三碗，好喇，等我再同大家講下味道先......

細滲 - 捌哥肉骨茶係我每次必叫嘅野，如果多人我就會叫大滲，因為佢會跟埋個火爐仔，d肉骨茶無咁快凍，但因為今次得兩個人，所以就叫左個細滲，細滲入面每樣都有d，我最鍾意就係三層肉/雞腳/豆卜。

我知你啦薄餅 - 呢個即係類似手抓餅，佢會配埋兩款類似咖哩嘅醬油，一個就淨香唔會好辣，另一款就會偏辣少少，個餅亦唔會好油。

淨怡保芽菜 - 我平時會叫怡保芽菜雞，但今日想試其他，所以無叫雞...食，但因為我好鍾意食佢地d怡保芽菜，所以就淨叫左一份嚟食，食得呢d淨芽菜，價錢就一定係唔抵食架喇，但我真心鍾意食，都唔理得咁多，因為佢地d芽菜又粗又爽口，入口好香甜。

馬拉滑蛋伊麵 - 呢個伊麵我係第一次叫，不過就有少少失望，因為我本身好鍾意食伊麵，但原來佢地個伊麵唔係粉麵舖個隻伊麵，係福字伊麵，不過勝左味道都唔錯，又幾有特色，配料又多，比佢僅僅合格啦。

當然仲有我極之推介，但我今次無叫嘅食物，鮮牛油咖央多士同喇沙。


☕️🍵🥤🧋🍺🍷🥃🍹🧉🍾🍶🥛
飲品 - 飲品我通常都係叫返佢地個馬來亞拉茶或者茶啡滲，不過我之前同朋友嚟，朋友有叫過佢地d特飲都話唔錯。


🍽環境：餐廳環境同裝修上都好有馬拉feel，入門口對木閘同牆身嘅裝飾就更加係特色之一，不過地方就唔係好大，枱亦都唔多，坐位同枱面係有少少迫，加上我鍾意叫好多款野食，枱面次次都唔夠擺。


🤵🏻🤵🏻‍♀️🤵🏻‍♂️服務：店員服務態度都ok，見佢都會同未嚟過嘅客人講下店舖有咩特式/推介等，上菜/執枱速度亦都好快，我要求refill肉骨茶時，佢見個碗有食過其他食物都會主動換個新碗比我，因為咁先唔會影響佢地肉骨茶嘅味道。


💰💸價錢：今日兩個人叫左4款食物，2杯飲品，埋單$350，呢個價錢雖然唔算平，但佢勝在食物質素取勝。


🐲💬總結：我大約係3~4年前已經有食開呢間，當時已真心覺得唔錯，而家直頭一想食肉骨茶就只會諗起佢，所以推介大家可以嚟試下。


推薦指數：❤️❤️❤️❤️❤️

-
🚩 花椒八角 (東涌)
東涌達東路花園地舖
—————————————————————
🤍餐廳推薦度：🤍🤍🤍🤍（4/5）
❇️每人平均消費：$350 (Dinner）
⭐️打卡指數：🦖🦖🦖🦖（4/5）
🤡服務：🦖🦖 🦖🦖🦖（5/5）
🍭味道：🦖🦖🦖🦖🦖（5/5）

由於屋企距離東涌唔遠，
所以久唔久我哋兩個都會去東涌食好西，
行到去達東路公園，
見到牆上有射燈影住呢間餐廳嘅名，
就心思思入去試吓呢間川菜。

店員安排咗我哋坐向昂坪纜車位置，
未食嘢已經要係咁對住個景打卡先，
咁啱係黃昏時間，
望住個日落加埋昂坪纜車，
再加埋啲嘢食簡直101分💯

我哋兩個人點咗五個菜，
平時大食嘅我哋五個菜都食唔晒，
如果細食嘅大家可能叫一兩個主食就已經可以🥹

等我介紹返我食咗啲咩先🤭

✏️貓耳仔
其實就係黑醋撈黑木耳，
呢個前菜味道除咗酸之外，仲有少少辣，
完全係正宗嘅開胃小菜，
味道唔會偏向太酸，容易入口🫶🏻

✏青椒皮蛋
顧名思義就係青椒加皮蛋，
但我個人認為小菜嘅醬汁比較普通，
青椒味道唔太突出呢度就扣咗少少分💪🏻

✏霸王辣子雞
辣子係我最期待嘅一個主菜，
見好似每一枱都有佢出現我都唔執輸，
成日以為咁多辣椒一定好辣，每次都唔敢試，
今次我呢個大鄉里都係第一次食辣子雞🤭
辣子雞脆得來唔會過硬，亦唔會太辣，
食食下我地兩個已經淨係focus辣子雞就知幾好味😌

✏️酸菜鮮牛肉
酸菜魚就食得多，配鮮牛肉都係第一次，
酸菜湯底味道唔會過酸過鹹，
廚師仲加左秀球菌（爽口）同秀珍菇，
如果加埋薯粉就100分😋

✏️青椒萵筍絲
呢個配搭第一次接觸，
上菜嘅時候已經聞到好有鑊氣，
萵筍絲食落去嘅口感同土豆絲差唔多，
呢個小菜都值得推介💯

✏️桂花芒果冰粉
呢個甜品不得不提，
本身冰粉就冇味，
但係加埋芒果同芒果汁，
食完一杯仲想追加🥹
桂花嘅甜品真係不得了

🦖以上食評只代表本人意見🐷

早前與朋友閒聊，無意中獲朋友推介這間位於大埔的居酒屋，今天乘著在附近工作，特意前來太和會一會這間朋友聲稱「非常美味」的居酒屋。


餐廳外型設計不錯，有日式特色。餐廳內大約有二十多個座位，只有兩張二人桌，其他都是六人桌，算是小店。八點半入座，只有兩檯客人，餐廳半滿，獲安排坐在最接近門口的一張二人桌。桌子非常小，估計較適合一人享用，大約只夠放三、四碟食物，幸好老闆細心，立刻搬一張桌子，讓我和友人可以擺放隨身物品，亦較方便上菜。桌上放有酒精消毒啫喱、一瓶七味粉，還有一個圓筒供食客擺放食完的竹籤。餐廳提供麥茶予食客解膩。


由於需要趁熱品嚐美食，與友人商討後，決定分開數輪下單，怎料我們吃得起勁，最後竟吃了足足四輪，食量驚人！


第一輪我們分別點了螢光魷魚漬、自家製免治雞肉棒、雞軟骨、雞頸肉、雞皮、雞腎、鵪鶉蛋，以及兩杯飲品，蜜桃乳酸梳打和烏龍茶燒酒。螢光魷魚漬 $50
大約有7-8隻螢光魷魚，味道十分熟悉，細想之下憶起無印良品的甜酸魷魚鬚，兩者的味道九成相似。一口咬破，醋漬汁湧出，充斥整個口腔，若喜歡甜酸醋汁一定喜愛這味前菜。作為前菜，甜甜酸酸，實是開胃，但畢竟是刺身，餘韻有海鮮的「鮮/腥味」，若不喜歡吃濃郁海鮮味者，可能需繞道。烏龍茶燒酒 $42
一杯完全不甜的燒酒，燒酒味經烏龍茶中和後不濃，但烏龍茶的味道不強，整體就是直接喝酒精的味道。飲的時候稍嫌狼狽，因為冰塊尚未融化，每一口都需要用唇隔開冰塊。或是筆者不習慣喝燒酒，感覺一般。雞頸肉 $26
很有驚喜！第一次吃雞頸肉，若你想將其與豬頸肉聯想在一起，請打消你的念頭！兩者雖然同為頸部，但沒有什麼相同。肉質爽口彈牙，多汁又不如豬頸肉般油膩。友人立刻提議要encore😋

雞皮 $26
由於筆者對雞皮興趣一般，交由「雞皮專家」的友人試食🤣 友人個人喜愛「軟雞皮」，即仍然保留一定煙韌度的雞皮，而非燒至全脆的雞皮。此店的雞皮偏脆，是友人不喜愛的那種，但她依然讚賞雞皮燒得美味，當然，當中應該夾雜著她的幾分饑餓而成的美味感。但相信雞皮仍是有水準之作。

雞軟骨 $26
筆者最愛雞軟骨，逢吃串燒必點。此店的雞軟骨燒得甚香，一粒大小適宜，屬於正常少許偏大的雞軟骨，粒粒均有雞肉，脂肪不多，可享受雙重口感。鵪鶉蛋 $22
筆者初嚐燒鵪鶉蛋，平日亦不特別喜好鵪鶉蛋，店員加上醬油燒鵪鶉蛋，很嫩，入口綿滑。

雞腎 $26
肉質非常爽口，沒有任何內臟的腥臭味，食材新鮮。師傅將雞腎燒得剛好，中芯保有淡粉紅色，燒得不錯！自家製免治雞肉棒 $48
配以月見汁享用。外皮脆，餡料有很重的蔬菜味，加入軟骨增加口感。若不喜愛蔬菜味道的食客可能未必喜歡。


第二輪我們點了厚切牛舌、汁燒牛小腸、黑毛豬肋條、味噌燒豬大腸、濱燒岩蠔、黑松蓉菇、芝士年糕。汁燒牛小腸 $34
必點！初嚐燒牛小腸，外皮既燒得十分焦脆，又有煙韌的口感，內裏粉質，沒有任何內臟的腥臭味，很美味。美中不足的是汁燒的調味較濃，筆者略嫌有點過鹹。
味噌燒豬大腸 $26
初嚐燒豬大腸，大腸依然留有一定的脂肪，口感很好，燒得很香，同樣沒有任何內臟的腥臭味。同樣有調味較濃的問題，筆者略嫌過鹹。黑毛豬肋條 $42
必必必點！連encore共點了三串！調味的香料令豬肋條錦上添花，香氣誘人。燒得焦香，外皮帶點焦脆，肉質很軟。配以伴碟甜甜的醬汁，再次將豬肋條的風味昇華。第一諜上菜時，店員刻意提及師傅看到我們拍照，特意以醬汁做出造型供我們拍照，很是可愛🤣厚切牛舌 $54
果然厚切，三大塊牛舌，但價錢偏高。牛舌只用簡單的salt & pepper調味已經很足夠，惟師傅略略重手了一點，偏鹹。牛舌燒得剛好，保留裏面的juicy，值得一試。黑松蓉菇 （鉛筆菇）$20
師傅特意介紹，因此菇外型像鉛筆，故有別名——鉛筆菇。此菇的草青味較高，口感結實，不是十分juicy的那種菇。友人不愛，但筆者覺得不錯，清新解膩。濱燒岩蠔 $48
最近一直想吃燒蠔，此燒蠔確能滿足筆者的嘴饞。燒蠔配以滿滿的湯汁，一口償湯汁，鮮甜得很！蠔新鮮，算肥美，不會燒得縮成一小塊，師傅在控制燒味生熟度方面確有一手。芝士年糕 $34
筆者最愛吃燒芝士年糕，不過此款年糕不是筆者所愛。筆者喜愛芝士鹹香味偏重的芝士年糕，有些店舖更會配以煉奶享用。此店的芝士年糕，芝士味不鹹不淡，就是平平的味道，年糕稍甜，甜味會慢慢滲出。外皮很薄，但沒有口感，不是脆的那種，而是有一塊薄皮的感覺。整體來說，芝士年糕不點也可。接著，師傅突然送上一款前菜。這間店的店員和老闆很友善，會與顧客聊天，今晚更總共送了兩個食品，此乃其一。這張照片是筆者與友人吃了數口才想起來要拍照，還請多多海涵。前菜只有兩款主要食材：四季豆和魷魚。四季豆十分爽脆，沒有渣；魷魚新鮮，爽口彈牙。兩者配以酸酸甜甜的醬汁及木魚享用，非常美味，亦為這頓晚餐加了一味清新，是非常解膩的菜色。筆者尤其吃到醬汁加了紫蘇葉的濃烈味道，另有芝麻、洋蔥。


第三輪我們點了清酒煮硯、燒三文魚飯糰、雞尾、雞頸肉（encore）、豬肋條（encore）。清酒煮硯 $52
共有13隻大硯，尺寸有誠意。硯肉鮮甜，湯汁清甜。好味！燒三文魚飯糰 $30
飯糰偏小，外皮燒得十分焦脆，猶如煲仔飯的飯焦，適合喜歡吃飯焦的筆者。但內陷的三文魚較少，整體而言，性價比不高。雞尾 $26
全晚MVP非它莫屬！必必必必必點！筆者和友人都是初嚐雞尾（即雞屁股），十分驚喜！雞尾燒得外脆內軟，雞尾重脂肪，但完全沒有油膩感，非常美味！


第四輪我們只點了雞翼和稻庭冷烏冬作結，我想店長一定很驚訝，兩個女生居然可以吃下這麼多。雞翼 $32
筆者愛吃雞翼，最後忍不住始終希望一試燒雞翼。雞翼外皮烤得很脆，依然保有一定的肉汁，不會像外面有些店舖燒得過火，導致雞肉乾柴。雞翼算是中上水準。稻庭冷烏冬 $50
冷烏冬配上酸酸的冷汁，作為一餐的終結非常完美，一解整頓的油膩。伴碟有芥末、薑末、大蔥和一隻生鵪鶉蛋。烏冬煙韌，份量不多，與友人共享亦不至於塞飽了胃。最後再次獲得師傅送贈美食，這道甜點如果公開發售，筆者一定要吃兩顆！這道紅豆糯米糍各樣都拿捏得非常好，先說糯米皮，十分軟糯，不漏，很重米香，筆者和友人此時已經很飽，但依然可以吃下這顆糯米糍而不覺有任何負擔。內陷的紅豆不會過甜，只有淡淡的紅豆香和少許甜味，非常適合已經大吃大喝完畢，希望吃點甜點完滿結束一餐的食客。


總結而言，這間居酒屋的師傅技巧高超，串燒基本上都是燒得剛好，不會有過熟的情況，食材新鮮，除了汁燒類燒物調味較重，其他均可。店員態度友善，看得出來平時都是街坊光顧。但店舖定價偏高，此點需自行斟酌。
最後附上餐廳的餐牌。

之前上網見到呢間餐廳裝修得好靚，又食少有嘅黎巴嫩菜，已經好想試一次😎
但又好忐忑會唔會係食D好難食嘅豆茸、🍅番茄、🥒青瓜🤦‍♀️
帶著想試，又驚中伏嘅心情下，終於同同事來呢度食飯😂

本身有訂枱，訂枱前一日，餐廳會打來confirm booking👍

去到餐廳係六點九左右，餐廳有提醒用餐時間係兩個鐘~
成個場都好中東feel，布置得好靚😳
仲有中東音樂聽，不過音樂略嫌大聲左少少😂坐低之後，staff就問飲乜水一💧Sparkling water or 💧still water~
同事冇為意，好順口答左佢💧still water~
結果staff攞左支💧礦泉水出來，一支盛惠 $50🤦‍♀️
如果唔講究水的話，記得要留神😂

坐低望一望menu，毫無頭緒，所以就問staff有乜野好介紹😏
係佢嘅suggestion下，我地叫左四樣野，後尾再加多兩個甜品~

Mix Cold Mezze ($195 + 36)
簡單講就係彼得包點醬😂
staff上枱時都有介紹到幾個醬係乜👍

Lebanese Hummus
係右手邊淺黃色個醬~
材料係鷹嘴豆泥、中東芝麻醬、🍋檸檬汁、橄欖油~
食嘅時候要將橄欖油同個個醬攪勻~
本身我都有D抗拒豆茸，覺得質感麻麻🤦‍♀️
但呢個醬好幼滑，好食👍

Mutable
係前面個碟，🍆煙燻茄子、中東芝麻醬、🍋檸檬汁、乳酪同橄欖油製成~
又有D紅石榴，酸酸地~
開頭食一細啖覺得麻麻地😓
點知大大啖咁食，又食得出煙燻味，幾得意😂

Muhammara
左邊紅紅地色個碟，由紅椒醬、合桃同石榴糖蜜製成~
辣辣地，幾惹味😋

🍞彼得包，一份2個，staff見我地4個人，都好熱心問我地洗唔洗加多2個~
一個$18，我地最後加左2個，一人一塊彼得包~
彼得包熱辣辣，又軟熟，唔會乾爭爭，好食👍🍆Roasted Eggplant ($128)
本身唔會點食茄子嘅我，覺得幾好食😂
烤過嘅🍆茄子，再加上🍯椰棗蜜同他他醬~
酸酸地，好開胃，好食👍🐏Freeket Mozzah ($268)
呢個我覺得係幾個菜入面最好食嘅野😏
羊腿好軟腍，又好入味😋
加埋底下綠色小麥之類嘅野，口感煙韌👍
佢仲配左個乳酪醬，用來點羊肉，立即提升層次😍🐮Shahrazad mix Grill Meat (Small - $498)
烤🐏羊、🐮牛、🐤雞~
🐏羊肉有分羊架同羊肉條~
羊架比較腍，幾好食😋
但雞同羊肉條，雖然好夠香料味，但比較韌，感覺一般，自己唔係太鍾意🤦‍♀️
佢地亦跟左個醬比我地點肉食，鹹鹹地~
烤肉底下有塊烤餅，索晒上面烤肉D汁，幾好食😚甜品方面，我地都叫左兩個share食😂
🍮Creamy Rice Pudding ($108)
左邊嘅🍚米布甸，相信大家都唔會陌生😂
口感煙韌，食得出粒粒米粒，又唔會好甜，
同埋真係幾creamy😳

🥛Znoud El Sit ($118)
即係黎巴嫩版炸乳酪😂
外皮幾脆，但中間軟滑，好重奶香，但唔會好甜😍
好多餡，用刀一切，奶餡已經流出來😂
同埋開心果一齊食，唔錯😋飲品方面，每人叫左一支🍻啤酒😎
本身係想試下黎巴嫩啤酒，但來到先發現係香港啤😂
左邊紅色樽 $80一支，黑色樽 $90~
我自己係飲紅色樽嘅，初頭飲，煙燻味幾重~
但隔左陣再飲，已經冇煙燻味了~
同埋都幾易入口~最後四位埋單共 $1904.1~
🍴食物方面好高質，每一碟都好滿意👍
💁‍♀️服務方面，上菜幾快，介紹食物都好詳細，唔錯👍
不過來呢度食野要有一口好流利嘅英文，或者帶埋識講流利英文嘅朋友一齊來😂
因為呢度全部都係外國人staff，冇人識講中文，同埋佢地講得好快，聽慢少少已經唔知講緊乜🤦‍♀️

在上環區，有3間 <Pacific Coffee> 分店，分別是無限極廣場、文咸東街及皇后大道中；我個人最喜歡的正是文咸東街分店！
早前8月，幫襯位於上環的文咸東街 <Pacific Coffee>，才發現增設 Bistro by Pacific Coffee！全港暫時只此一家！這裡落地玻璃，開揚光猛，讓人放鬆心情！ 由 8月至今，我幫襯了好幾次堂食！Menu
供應時間：12:00~8:00pm
供應美食多元化，包括：小食、沙律、漢堡包、意粉、湯...等！ 升級版獨家美食此中尋 這間分店還有供應酒類飲品 Bistro by Pacific Coffee 有別於 Pacific Coffee 的是有指定餐牌，供應的食物不同、服務也不同！
Pacific coffee 以全自助形式，Bistro by Pacific Coffee 則是半自助形式，食客落單付款後，店員會送上食物；卻不會額外收取加一服務費！
店員亦會為 Bistro Pacific Coffee 食客，放上餐具連紙巾！相當周到！ Bistro by Pacific Coffee：Lunch 1)All day breakfast 全日早餐 $128
第一次幫襯 Bistro by Pacific Coffee，我最想嚐試 All day breakfast，加上背景打卡一流呀！
酸種麵包既厚身又大件，足以令人飽肚， 外層香脆，麵包包質濕潤鬆軟，已塗上牛油，簡單的多士味道！
煎雙蛋，可要求蛋的烹調熟度！
煙肉有兩片，火候恰到好處！
法蘭克福腸富有肉汁，調味不算重口味！
茄汁焗豆有焗熱，粉腍入味！不過個人不喜歡食！
薄切蘑菇似是罐頭貨色，第一次以黑椒提味，第二次加入香草食落更惹味！Matcha Latte 抹茶牛奶 (Tall) $39 ：半甜
恰巧！店方由 7~8月推廣是指定飲品可按自己口味，自選甜度，務求更貼合食客所需！相當貼心！
自此之後，抹茶牛奶繼續可以自選甜度，太好嘞！
水溫夠熱，散發甘香，入口輕微苦澀而少許甜，正合我意！ Lunch 2)鷹嘴豆泥及中東芝麻醬 配自家比得包 $75
兩件半月形的比得包，充滿麥香！ 表面的黑白芝麻帶出一點嚼勁；
鷹嘴豆又稱雞心豆，豆泥溫熱軟綿，加入橄欖油更香滑，不排除加入檸檬汁，令人開胃！ 
把比得包夾住雞心豆泥都好方便易食呀！ 素食者都啱食呢！凍檸檬茶 $30：少甜
除了茶餐廳之外，連 Pacific Coffee 也有供應，相對價位略高！幸好！當時做 Promotion，Order Bistro by Pacific Coffee 餐牌食品，飲品可享半價優惠，才算合理！
有 4片檸檬，冰凍透心涼，食客亦可要求甜度，少甜程度，酸中帶甜不錯喝，口感清爽！ Lunch 3)Bailey Latte $56
以透明玻璃杯呈上，賣相層次分明又得體，卻無預期的咖啡拉花！
Baileys Latte 是酒香與咖啡的完美結合，入口既有咖啡的醇厚又有 Baileys 的酒香及酒味！ 兩者口味各不相讓！鮮蘑菇意大利扁意粉 配巴馬臣忌廉汁 $98
即叫即製，等上 10~15 分鐘
份量都幾多！送上桌充滿香氣，意粉熱辣辣，口感帶煙韌！ 均勻沾上忌廉汁，忌廉汁有點巴馬臣芝士的鹹香味，卻不會有膩滯感！新鮮軟身的蘑菇也不少！整體不濃膩！ Lunch 4)28小時慢煮手撕豬肉酸菜漢堡 配焗薯角及秘製醬汁 $128
等上大約 15分鐘，即叫即製的漢堡包及炸薯角
焗薯角也好大份， 所以，我只好淺嚐炸薯角的滋味，薯角香脆粉糯，薯味濃郁，配上茄汁簡單美味！
漢堡包烘過之餘，亦塗滿牛油，芳香洋溢，令我食指大動！
製作一絲不茍，洋蔥絲、酸菜絲、甘筍絲炒過，酸香醒胃又口感帶清爽， 手撕豬肉熱辣辣香噴噴，夾雜脂肪又肉質軟嫩多汁！ 最推介美食！熱朱古力 (Tall) $39 : 少甜 
少甜的熱朱古力，朱古力絕不遜色，只是香甜度減少了！依然香滑順喉！

香港人冬天最鍾意食嘅一定係火鍋或者⋯⋯燒肉呀！！！今日就嚟食依間好出名嘅「和宴」，朋友話佢係香港燒肉嘅始祖，咁我就冇去考究到底係唔係事實，但係佢嘅位置就有少少隱蔽，如果係第一次嚟有機會要搵一搵，因為佢係蘋果旁邊，而且大廈正面顏色同蘋果一樣，所以好容易錯過，而且佢嘅電梯唔係直上12樓，需要係5樓轉一次電梯，幾有日本隱世小店嘅感覺

當晚唔係咩特別日子，所以唔爆場，所以唔肯定佢抽風好唔好（雖然我哋食完身上都冇咩味）


咁我同朋友都叫咗依個$980嘅套餐（留意返$980係一個人嘅價錢未計加一）唔好以為得好少野食咁，但實際食嘅時候其實好飽肚，因為差不多全部都係和牛，會很膩


日本產水果番茄配士佐酢啫喱

當你點完餐之後，好快就會開始上前菜，而水果番茄甜就一定架啦，但估唔到同士佐酢啫喱咁配，因為入口你先會食到啫喱嘅酸味，番茄嘅甜味係呢個情況之下會更加突出，但係唔可以單吃士佐酢啫喱，因為會太酸


是日宮崎和牛刺身併盤

和牛刺身真係需要靚和牛先好食，油脂分布平均，入口即化（如果怕生的朋友都可以叫職員幫你開咗爐，燒一燒先再食）


炙燒宮崎和牛海膽壽司

輕微炙燒過嘅和牛配上海膽，簡直就係雙重滿足，滿滿嘅油分充斥住你嘅口腔，海膽嘅鮮味係依種情況下更加特顯🤤🤤


涼拌雜菜併盤

味道都係偏淡，用於食完和牛解膩，不過不失咁



宮崎和牛 薄切牛排肉 （壽喜燒風）

首先上咗依個薄切牛排肉，職員會同你講大概每邊燒三秒左右就食得，食嘅時候再點上蛋汁，味道非常好，不過雖然話係壽喜燒風味，但食落去沒有平時食壽喜燒嘅甜味，不過食完兩片之後都已經覺得有點膩



之後除咗薄切牛排肉之外其他肉類都會等你食完薄切牛排肉後一個拼盤咁一次過上晒，分別有鹿兒島走地雞雞腿肉（麵豉）、宮崎和牛特上雪花牛排肉、澳洲和牛横隔膜（醬汁）、宮崎和牛特上肩肉眼、鹿兒島豚五花肉和特上牛舌棒


和牛油分重，入口即化就當然架啦，所以雪花牛排肉真係冇得輸，不過食嘅時候最好用菜包住減少油膩感，咁先可以食咁多都唔會膩得滯


肉眼；相對就冇咁重油分，但係肉味濃啲，同樣咁好食


和牛横隔膜；肉味最重，雖然油分沒有日本和牛咁重，但係加上醬汁嘅味道真係令人一試難忘，不過有一定厚度，所以要比較耐心少少去燒（職員話燒到兩面都已經金黃色先剪開食）


牛舌棒；係我今餐中最鍾意食嘅野之一，平時食嘅牛舌一般都係薄燒，完全同依個唔同，咬落去嘅時候仲會食到牛舌嘅彈牙同牛味，而且佢係棒形，所以食嘅時候都好方便咬開


雞腿肉；係我今餐中最鍾意食嘅野之一，平時食燒肉都唔會覺得雞肉有啲咩好食，但係呢個雞肉真心係我食過咁多間燒肉店之中最好食嘅（可能係我食嘅燒肉店太少嘅關係（戴定個頭盔先）就算我哋唔係好識燒，但係燒完，肉質都係勁嫩，完全唔會乾柴柴，而且因為我哋選擇咗麵豉味，食落去甜甜哋，如果唔係因為我哋已經飽咗，真係想叫多一份


豚五花肉；都係比較出色嘅，唔會有臊味，肉質都係嫩滑，就算燒耐咗都唔會好難咬，但係對比其他肉就失色咗少少



迷你辣牛肋肉湯飯

咁到你食完燒肉先會再給你上主食，就算係迷你版材料都不會馬虎了事，牛肋肉有兩大嚿，而且好腍身，唔需要咀嚼般已經可以吞下肚子，而且辣辣哋，就算食肉食飽左也會不自覺地一啖接一啖咁食，好容易一碗就咁食完



迷你盛岡冷麵

因為主食可以每個人都選擇不同的，所以朋友就選擇咗冷麵，同樣材料一啲都唔馬虎了事，而且酸酸辣辣好開胃，唔會擔心食唔晒，因為佢嘅份量剛剛好你食完都唔會覺得太飽，而且仲可以解剛才食燒肉嘅油膩感，非常好



最尾嘅甜品就係一球雲呢拿雪糕，雖然食落去知道係某個大牌子，但係令成件事唔同晒，即刻覺得佢好馬虎了事，原本好好嘅一餐即刻失色咗


整體來講，成個用餐體驗都好好，不論係食材嘅新鮮度、好味度定係職員嘅服務都好好，就係最尾個甜品有少少馬虎了事，如果唔係真係一個100分嘅用餐體驗



以上均是我個人觀感，每個人嘅口味各有不同，所以末必同每個人嘅用餐感覺一樣，如有不同，敬請見諒。

因為銅鑼灣時代廣埸做緊優惠券，每消費滿$200即可用一張$100美食優惠券(加一服務費不計算在內)，變相係半價咁制，超級抵食！而且午市仲有套餐，仲加抵食，但未開門就好多人排隊，要食趁早去。六日晚飯去都幾多人食，等左15分鐘左右先入得，食物種類好多，有剌身、壽司、串燒、鍋物、飯麵類，即使同行有人唔食生冷野都總會揀到野食。
~~~~~~~~~~~~~~晚市~~~~~~~~~~~~~~~特上刺身拼盤 $588
★★★★☆
九款刺身有三文魚、拖羅、油甘魚、帶子、甜蝦、魚子同埋三款魚刺身，最有驚喜係三款魚刺身，本身我唔太食其他魚刺身嘅係香港，因為好多時都會中伏好腥，但三款一啲都唔腥，仲要幾鮮甜，刺身盤附帶一個柚子醬汁，食落帶少少酸幾清新；帶子都大粒同埋清甜；油甘魚食落都幾肥美，食得出個甘香味；三文魚都唔錯幾肥美；甜蝦算鮮甜同埋大隻，蝦頭有膏，個肉質帶小小爽同腍口；拖羅反而一般啦，唔算太有味，唔太肥美；魚子有小小腥一般般。成個刺身拼盤整體黎講都幾唔錯，重點係夠新鮮，每一件刺身都唔會話好細件或者薄切。蔥吞食魚腩米紙卷 $128
★★★★☆
一碟有成十小件，呢個食落都幾特別，滿滿吞食魚腩加左蔥同埋帶少少辣嘅蒜汁，好豐富，佢較特別係用左米紙卷包裹住，咬落口有小小煙韌口感，有驚喜。即使唔加鼓油都夠味道。串燒 (名古屋交趾雞皮、牛脷鹽燒) $48+ $68
★★★☆☆
呢2串串燒反而麻麻，性價比較低，唔係難食但係未去到俾呢個價錢食。雞皮脆口香口唔會話好乾身；鹽燒牛脷個味道夠，但係偏燒得老左，幾韌口下，都需要咬耐下先得。呢個價錢不如直接去日式居酒屋會更加有風味同抵。鰻魚蒲燒石窩飯 $178
★★★★☆
鰻魚切開兩大舊，又長之餘仲要夠哂厚肉，醬汁又夠味，冇骨。但如果可以再多啲鰻魚汁會更好，因為唔太夠撈個飯。用左石頭窩黎整個鍋飯，中後段會有飯焦，食落更加香口惹味！個鰻魚份量食到成個飯食完都足夠，算係抵食，食落係啖啖肉！

~~~~~~~~~~~~~~午市~~~~~~~~~~~~~~~特上刺身御膳 $368
★★★★☆
午市套餐包左沙律、前菜、甜品，額外仲有唔同小菜、飯等跟埋。呢個有齊味噌湯、海鮮茶碗蒸、漬物、飯，另外可以叫佢地白飯轉做壽司飯，跟刺身食就唔會咁怪。呢個個份量會比起晚市食嘅少D，晚市刺身每款都會有兩塊，呢個某啲例如牡丹蝦、帶子就會得一件，但價錢上都好明顯平左一折。魚嘅刺身都幾新鮮，係三文魚同吞拿魚唔夠肥美，冇咩魚味，另外一點，今次食啲刺身太凍，唔知關唔關岩岩開店事。壽司天婦羅麵 $268
★★★★☆
呢個都係午市套餐，一個套餐有齊壽司、湯麵(可選烏冬或蕎麥麵)，仲有天婦羅，好豐盛，啱哂想食壽司但又想食小小熱野黎暖胃嘅人！佢另外仲有一款係刺身黎取代壽司。先講壽司，中規中矩，但欣賞佢個壽司飯夠細同握得實，食落有壽司飯但更多係上面個塊主角。甜蝦同埋魷魚夠爽口，其他普通冇咩太大記憶點。天婦羅即整夠熱又脆口，但個炸漿唔會太厚，2件蝦係熟蝦，都唔錯，其餘都係蔬果類，例如芋頭、粟米芯、茄子、南瓜。最一般係個烏冬，用左麵豉湯底但有啲過咸，個烏冬係一般最普通嘅烏冬，唔係真打或者冷藏個啲，口感、質感都會爭啲。但整體都好抵食咁多款野，仲要有埋前菜、沙律。

🌟總括：剌身同壽司都幾唔錯，夠哂新鮮，擺盤亦放得好靚，值得叫。石窩飯就中上表現啦，但串燒唔太建議叫，唔算特別出色但價錢偏貴。而家用埋現金券等於半價，呢個質素超級抵食兼超值，順帶一提，商場現金券每次只可以用5張！中午食就會好抵，但晚市就會再多啲選擇。