有時想搵間靚餐廳食飯，其實係想要個喘息空間放空吓，估唔到旺角鬧市都有選擇。主打新派泰菜嘅「青花」以大地色為主調，室內掛滿花花草草之外，仲有落地玻璃望到天台草地及映透柔和自然光，儼如鬧市中綠洲。
唔只環境靚，呢度嘅新派泰菜真係好吸引!! 大廚用各種煮法、自家醬汁重新演繹泰菜，好似藍蝶花蟹肉菠蘿炒飯、榴槤薄餅、路邊炭火蒜炒豬腩生菜包等等，都係以經典東南亞菜為基調，再加入創作元素而成。配埋靚靚擺盤同飲品，好啱同朋友邊食邊打卡，享受輕鬆用餐氣氛。
「青花」有多款新派泰菜選擇。
店內放滿花草，加上大地色調充滿東南亞風味。
藍蝶花蟹肉菠蘿炒飯
夢幻藍色蝶豆花飯真係好吸睛，同行友人都會忍唔住即刻打卡。炒飯入面有腰果、肉鬆、提子乾、蛋絲配料，最特別係加咗燒菠蘿，鹹甜交替啱晒夏天食。
最估唔到係蝶豆花飯粒好煙韌，有時又會食到脆脆果仁，口感好豐富呀。
藍色蝶豆花飯好夢幻，特配燒菠蘿、腰果、蝶豆花飯交織多重口感。
路邊炭火蒜炒豬腩生菜包
平時生菜包都係用肉碎，「青花」就轉用更有存在感嘅豬腩肉同脆脆煙肉。
豬腩肉肥瘦適中兼啖啖肉，好佩服大廚創新地用咗輕甜嘅秘製醬汁+原顆蒜頭爆炒，配埋清爽生菜一齊食完全唔膩。私心鍾意蘸啲酸辣汁一齊食，辣辣地更有風味。
生菜包嘅經典肉碎變成豬腩肉同脆脆煙肉，更加香口兼啖啖肉。
芒果糯米飯
一到夏天就想食啲甜甜酸酸嘅嘢，嚟到甜品環節真係唔少得泰國芒果糯米飯。「青花」嘅蝶豆花糯米飯好夠熱，口感特別軟Q。芒果肉又多又厚切，絕對大滿足。
夏天必食芒果糯米飯！蝶豆花糯米飯又熱又軟Q。
青花 (THE FOREST)
地址: 旺角奶路臣街17號THE FOREST 1樓107-108號舖
電話: 34682558
