香港10大呃Like雪糕 | OpenRice 香港開飯喇

喺香港，相機先食是常識吧？連會融嘅雪糕亦都唔例外，喺「熱辣辣熱辣熱辣辣好熱好熱」嘅天氣之下見到有透心涼Feel嘅雪糕自然特別想Like，而有特別造型或者口味嘅雪糕就更加多人注意！香港有邊啲「呃Like」雪糕值得一試？睇落去啦！

集體回憶粒粒雪糕　　粒粒雪糕

Photos by 。艾子隨行。 & Ms. KaBYan
粒粒雪糕可以話係唔少九十後嘅童年回憶，曾經有段時間全線粒粒雪糕機逐漸喺香港消失，不過而家佢返咗嚟啦！雖然改用人手裝落碗到，但依然係一粒粒唔同顏色嘅雪糕。雖然口感偏硬而且甜咗少少，但就有回憶加分。

唔易融玫瑰花雪糕　　Make It

Photos by chyyoki & V熹
香港有幾間甜品店都有花型雪糕，介紹呢間最重要嘅原因係佢地嘅花型雪糕係用模雪硬，所以就算比相機食多陣都唔洗驚。而且花瓣細節比其他即造嘅花型雪糕精緻，呃Like啱哂。如果唔鐘意收花，另外仲有相機形雪糕，一樣吸睛。

浮誇層層疊雪糕　　Emack & Bolio's

Photos by Hunter115 & olfooddiary
美國波士頓品牌，最大嘅特色就係可以玩層層疊：超過20種口味雪糕可以疊二至六球！加上雪糕筒都有唔同棉花糖或者朱古力口味，大堆頭到有種美式浮誇嘅感覺！雖然貴咗少少而且食得比較輪盡，但可以好似小朋友咁任性食層層疊雪糕都係另一種體驗吖。

韓式爆谷雪糕　　Sweet Monster

Photos by ringolifestyle & mama-gugu
韓風繼續吹，而韓式雪糕當中就以呢間最站得住陣腳，佢係韓國第一間雪糕車甜品店，以嘉年華做定位，所以雪糕都加上爆谷！沾滿爆谷嘅軟雪糕唔單止有Gimmick，食落一軟一脆，甜魔可以揀焦糖或者朱古力爆谷甜上加甜，相反就可以揀帶少少鹹香嘅芝士爆谷。

夢幻噴煙雪糕　　松板庫

Photos by hkfoodie_lifestyle & hkfoodtalk
本身雪糕已經好有冰凍感覺，加埋白煙就更加Cool！呢間嘅雪糕杯有兩層，下面嗰層加咗乾冰同水營造噴煙效果，亦幫雪糕Keep住低溫，咁就可以放心影相啦。而且雪糕口味夠多，例如之前期間限定嘅Yoobi曜日每日一款甜酸苦辣口味，亦有季節櫻花口味。

霸氣蜜瓜芭菲　　i CREMERiA

Photos by rachelha25 & Ngsze
要喺香港眾多雪糕店之中突圍而出的確需要花啲心思，而呢間就將雪糕加上日本直送嘅蜜瓜，而且仲可以要半個咁多！一圈圈嘅軟雪糕加上香甜多汁嘅蜜瓜唔單止夠霸氣，而且大大份可以開心Share。自私食嘅話亦有唔同芭菲杯選擇，如果價錢平啲就Perfect池啦。

邪惡冬甩雪糕三文治　　Munchies

Photos by Kwongggg & olfooddiary
有時候兩大邪惡勢力聯手會帶嚟驚喜，其中一個例子就係呢度嘅冬甩加雪糕！自家制雪糕口味多變，夾埋一樣係Homemade嘅微暖鬆軟冬甩，無論係味道定邪惡指數都係一加一大過二嘅等級！雖然冬甩稍嫌油膩而且單價頗高，但偶然放縱一下都得嘅。

吸睛藍色炒雪糕　　Holly Brown

Photos by Cannyyy & JamTea
雪糕唔同口味自然就會有唔同顏色，不過Tiffany blue就真係好少見。呢間連鎖Gelato店就有近似顏色嘅雲呢嗱雪糕！而且炒雪糕有唔同配料，例如藍星魔力就會有藍色雲呢拿雪糕、蜜糖星星同彩虹糖，啱哂心多多鐘意咩都加嘅吃貨。

台式珍珠奶茶雪糕　　Color ChaCha

Photos by samuel_wu
好嘢食不斷玩Crossover，最近到台式珍珠奶茶同雪糕！呢間小店出嘅茶味軟雪糕唔係新嘢，但就係第一間加埋煙韌珍珠落去做Topping。鐵觀音聖代嘅鐵觀音軟雪糕夠茶香，而珍珠就增加甜味。不過食家話雪糕比較容易融，各位Foodie影相要快手啲啦。

多花款雪糕三文治　　Elephant Grounds

Photos by Yan~* & hkfoodtalk
最後講到唔同花款嘅雪糕三文治，就一定要提到呢間Cafe。每個星期都會更換口味保持新鮮感，有基本款嘅曲奇夾雪糕，有時候亦會有特別版嘅綠茶菠蘿包配生果同雪糕，或者非常少女Style嘅馬卡龍加雪糕，每次去都可能會搵到新驚喜。

隨時接收最新資訊
讚好OpenRice專頁！