筲箕灣呢間新店好啱打卡，唔單止裝修以嘉年華為主題夠特別，菜式配搭同賣相都精心設計過。好似席前點火嘅火焰芝士、即Shake即食嘅Shake Shake海鮮袋、色彩繽紛嘅水果奶昔等。餐廳氣氛輕鬆歡樂，同朋友或者屋企人一齊食都好啱。
 

Dirty Skillet位於筲箕灣，菜式同餐廳名一樣以「Dirty」為主題，唔係指污糟，而係希望大家可以暫時放低儀態、盡情享受美食，「Eat as messy as you can」咁解。裝修參考歐美復古風格，營造馬戲團嘉年華氣氛，最搶鏡嘅一定係餐廳中間嘅旋轉木馬卡座！
 

Dirty牛扒（$380）

挑選肉質結實嘅牛板腱，以慢煮方法令肌肉纖維軟化，同時鎖住肉汁！所以瘦肉比例高嘅同時，食落亦相當柔嫩多汁，足16oz加上厚切都唔會覺得好韌。牛扒用多款香料包括紅椒粉、辣椒粉同雜菜醃足一日，非常入味。
 

新奧爾良Shake Shake海鮮袋（$398）

海鮮袋非常足料，有龍蝦尾、蝦、帆立貝、蜆、青口、西班牙風腸、粟米，同薯仔，2至4人分享都夠食！用美國直送醬汁加上牛油製作秘製醬汁，海鮮亦用海鮮湯煮過，鹹辣惹味同時保留海鮮鮮味。
 

火焰芝士（$108）

選用煙燻車打芝士，廚師會即席加上冧酒然後點火，視覺效果十足！打卡之餘亦增添焦香同酒香。中間係餐廳特製黃梅醬，味道酸甜可以減低芝士膩度。半融芝士配搭烘過嘅麵包一齊食，芝香十足。
 

熔岩芝士洋蔥餡餅（$198）

鍾意拉芝嘅話仲可以一試呢度嘅熔岩芝士洋蔥餡餅，餅底同餅面係分開焗製，入面就係大量芝士！用嘅係車打芝士所以鹹香十足，加上洋蔥增加清甜味道，邪惡得嚟又唔會太過Heavy。
 

 

小食拼盤（$168）

一班人開心Share就最啱嗌拼盤，呢份有齊酥炸墨魚條、蒜蓉牛油雞翼、炸秋葵、炸豆腐、炸薯條，同雞心豆蓉。墨魚同雞翼都相當皮脆肉嫩，炸秋葵同炸豆腐亦夠酥脆香口。
 

梳乎厘奄列（$115，製作約30分鐘）

甜品推介係梳乎厘奄列，用100%雞蛋焗製，唔落麵粉所以適合進行緊低碳或者生酮飲食嘅朋友。奄列口感真係好似梳乎厘咁有空氣感，蓬鬆輕盈到入口即溶，同時蛋香十足。配埋忌廉同水果，甜而不膩。
 

Dirty Matcha Latte（$48）

飲品都配合返餐廳主題，例如呢杯Matcha Latte就滿瀉晒咁好啱打卡。飲落口感柔滑帶淡淡抹茶香，甜度適中。
 

（左）Bananarama Shake（$58），（右）Blueberry Cheesecake Shake（$58）

另一推介係Shake系列，用新鮮水果打成，有香蕉芒果、藍莓芝士蛋糕、椰子熱情果等唔同口味選擇。
 

Dirty Skillet
地址：筲箕灣筲箕灣道393號形薈地下G12號舖

文、相：Cathy