講起韓國菜你會諗起咩？泡菜？炸雞？芝士吐司？其實仲有最經典嘅人參雞鍋！秋天到食返碗人參雞暖下肚其實都唔錯，如果同你講呢煲人參雞唔單止可以就咁飲，仲可以變做湯底打邊爐又點睇？唔係開飯仔信口開河，嚟尖沙咀呢間新派韓國菜餐廳就有！
The Joomak最近推出全新「韓鍋」，有法國春雞人蔘同大蜆泡菜羅宋兩款湯底任揀。前者唔單止有補氣活血嘅人參同養生嘅紅棗、杞子、准山等燉煮五個鐘，而且仲用咗法國春雞，雞肉嘅鮮甜味中和咗人參嘅微澀。
後者就用韓式泡菜同鮮甜番茄配搭肥美大蜆，自己仲可以再加水牛芝士同車打芝士，同肥牛一齊食簡直就係邪惡首選！
想過一個暖笠笠嘅秋冬，除咗湯底好當然仲要有配料啦。注重健康嘅你可以揀呢個龍蝦豐盛拼盤，唔單止有原隻生猛龍蝦，同美國黑豚豬腩片、特級美國肥牛等肉類，仲有Super Food羽衣甘藍，同少見嘅水晶冰菜，打邊爐都可以食得健康啲。
貪心嘅吃貨們除咗打邊爐，仲可以嗌埋佢地嘅炸雞，特別係呢個10月限定粉紅炸雞。粉紅色醬汁其實係洛神花同蜜糖，上面再加石榴子同京蔥點綴，酸酸甜甜又有粉嫩賣相，少女們一定Like爆。套餐仲包一杯紅棗草莓雪沙，最重要嘅係佢地為咗支持10月粉紅革命活動，賣出一份套餐就會捐出$10畀香港癌症基金！
最後睇埋嘢飲，秋冬想潤返下就最啱飲花果茶，有黑糖玫瑰花茶、洋金菊黑枸杞茶同蜜糖蘋果茶三款選擇。想試新嘢就唔好錯過養顏雪沙系列，例如人參蜜糖雪沙就有原條真·韓國人蔘！睇嚟呢個秋冬會繼續吹「韓」風喇。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
1. 牛頭角特色食店攻略
隨時接收最新資訊
讚好OpenRice專頁！