講到名人飯堂，你又點可以唔識店名簡單易記嘅16 Shell呢？炮台山蜆殼街16號，只要你知道店舖名，就會連佢喺邊都知！聽聞謝霆鋒同其他明星會經常都會嚟食飯，話唔定嚟到隔離個枱全部都係大明星！小編心郁郁即刻去碰碰運氣。小編去到雖然見唔到謝霆鋒，但餐廳裝潢高雅古典，成功吸引到我留住係度！最令人估唔到係入面嘅菜式驚喜不斷。 白酒煮蜆相信大家都食過，喺坊間西餐廳都係一道常見菜式。依道菜式特別加咗牛油，令到個汁更為濃郁，而且包住蜆肉，啖啖鮮甜。 牛扒由美國直送，質素非常高，所以唔需要落太多調味料。5成熟岩岩好鎖住肉汁，但同時帶出牛肉鮮嫩嘅肉質，再加埋白酒牛油蘑菇汁，齒甲留香。 依款麵包係餐廳招牌菜，聽聞係謝霆鋒獨門秘方嚟！食落去的確係一個全新嘅體驗！平時嘅蒜蓉包，雖然香脆但蒜蓉太濃味。相反，依度用咗黑炭包，感覺比一般麵包健康同軟熟，而且黑蒜有一種獨特嘅甜味，令人一食上癮，送酒一流。

日本居酒屋意思指小酒館，即係提供酒類同飯菜嘅料理小店，呢個正正係小店老闆開創酔庵居酒屋嘅原意－－提供一個讓上班族收工後可以Chill一Chill嘅地方。平時返工工作壓力咁大，搵唔到好方法去釋放，小編推介去酔庵居酒屋，同朋友一邊傾計一邊小酌一杯。小店擺放各種日本清酒，小編見到都心思思想叫一細樽嚟小酌一番。 店内環境舒適，裝潢似足日本居酒屋，牆上掛有富有日本特色海報，橙黃色燈光更讓人陶醉在此。 世界各地都有生蠔出產，但只有寒冷海水，先可以生長出肉質鮮美爽脆嘅蠔。蠔肉爽口，鹹味較重。唔講唔知，原來生蠔汁海水鹽度愈高，生蠔味道就愈鮮甜。天然礦物質釋放，食落令人有一種特别快樂嘅感覺。 選用去骨雞腿肉，雞腿部位因經常活動，所以肉質結實，脂肪較少，好適合油炸。炸雞肉汁香濃，醃製後雞肉更美味。 除咗有生蠔、炸物，串燒都係配酒佳選。小店嘅串燒選擇非常多，實有幾樣你會不停點。小編對豬軟骨情有獨鍾，肉串本身已經夠晒入味，再加埋醬汁，味道更加錦上添花。

小編作為偽文青，喺繁忙工作背後，時時都想喺午飯時間有一個寧靜悠閒空間，靜靜整理自己嘅思絮，而唔需要好趕咁係茶餐廳食個快飯。小編喺西環搵到一間隱世Cafe，除咗可以坐低慢慢食，仲有一個特色庭院可以比大家坐低傾下計！想知係點？等小編帶你去睇下啦！ 餐廳有一個別有洞天嘅庭院，有唔少植物做擺設。配合埋牆上嘅特色壁畫，令環境增添氣氛。如果想靜靜享受獨處嘅空間，或者想三五知己談心，依個地方都絕對適合你。 用咗椰菜花取代米飯作為主材料。依款菜式不但減少米飯嘅糖份，而且加上大量椰菜花同燈籠椒，合符多菜少肉嘅原則，適合健康人士。依款看似簡單嘅菜式，但落足晒心思。首先將菠菜磨成蓉，然後再加上蒜頭、洋蔥、雞肉、長通粉同其他配料。雞肉選用雞胸肉，肉嘅油份唔多，醬汁非常清新，又一健康之選。 打破傳統框架，喺酒入面加上花椒八角，味道帶啲嗆烈，飲落去精神為之一振。

香港人一方面好想幫襯小店，一方面又好怕小店品質無保證，其實有好多小店都係秘寶，只係大家習慣於行清一色嘅商場舖頭，未有緣品嚐到小店嘅好。位於長沙灣嘅，一行入去就從裝修佈置感受到濃濃日式小店情懷，再加上店員服務態度親切，令小編印象深刻。更加估唔到嘅係，仲可以食到真正嘅炭燒和牛非常有風味，估唔到喺呢一區都會有品質咁高嘅居酒屋，一齊跟住小編去睇睇。 雖然舖頭仔細細，但大大話話都收埋差唔多30款唔同嘅清酒，大家嚟到可以慢慢揀自己鍾意嘅口味，話唔定仲可以試到新口味你鍾意添。 五款海鮮包括：大虎蝦 、大蜆、烏賊、仙貝同廣島蠔。以新鮮蔬菜同北海道葛絲做底，湯底調配到甜甜地，更突顯每樣食材嘅鮮味，沾上湯底之後更加鮮甜。既食到湯底甜味，海鮮又夠晒新鮮爽甜，讚！ 拼盤入面有紅蝦、吞拿魚、深海池魚王、三文魚、海膽同赤貝，逢星期四、五、六都由日本直運，鍾意食刺身一定要試下真正日本刺身厚切嘅滋味！除咗拼盤呢啲既定嘅刺身種類之外，佢地仲會入一啲好刁鑽嘅刺身，好似八角魚、秋刀、沙甸等等刺身，數量有限，鍾意獵奇嘅你一定要去試下啦！ 一份天婦羅入面有蝦、茄子、秋葵、冬菇同南瓜，炸漿估佢唔到咁酥脆又唔會厚粉，材料都算新鮮足料。食落啖啖都係食材爽脆嘅感覺，而唔係腍滋滋粉團，值得一試。

庸碌嘅生活，好容易令人忽略生活中嘅每個小幸福。間中獎勵下自己，品嚐用心製作嘅佳餚美點可以重拾對生活嘅熱情。位於銅鑼灣，以法國菜為基底再配以日本新鮮食材同元素，非常講究細節、食材同食物製法，務求大家可以享受到與別不同、完美嘅一餐。 裝潢以木為主，地板同牆身都用木材，帶比大家溫暖嘅感覺。露台仲可以眺望馬場景色，大家可以喺度chill 一 chill，仲可以食水煙同雪茄放鬆一下。每張檯上面嘅擺設一樣落足心思，用嚟放置餐具嘅石頭碟係富士山火山石，而樹葉裝飾係來自日本嘅樸葉 (hoba leaf)，原本只係用嚟包裹食物嘅樹葉，花過心思之後喺度為大家帶嚟現代感覺。 今次小編去試試佢地Lunch Set，一個set有Garden salad with Fig或Soup of The Day，再唔係可以兩樣要晒加(HKD20)再加Main同甜品、餐飲。前菜當然要達到開胃效果啦，呢份可愛而不失精緻嘅，以藍芝士作為基底，再加上柑桔醬嘅酸甜味，味道口感融和，酸甜芝味互相輝映，同時夾雜南瓜種子，令口感更加爽脆。 慢煮神戶和牛，醬汁非常開胃，以酒汁微微酸味帶出和牛濃香。廚師建議將牛肉混和白色嘅椰菜心醬汁、紅色燈籠椒醬同啡色牛肝菌醬一齊品嚐，更能食得出牛肉鮮味。牛面頰非常嫩滑，細膩口感，配上別出心裁嘅醬汁令人好滿足。Lunch Time想食個飯，呢道一樣令你大感滿足！龍蝦份量非常多，食落夠晒鮮味。整個飯以龍蝦汁做base，龍蝦嘅濃香滿佈整個飯，龍蝦同飯量都非常豐富，食完呢份午餐真係差足電！

想同成班friend吹水、睇波又有得玩？喺觀塘嘅就啱晒你啦！睇個名都知佢地以體育為主題，去到有好多部電視都播緊體育賽事，仲有足球機、鏢機同桌球玩，甚至連露天位抖氣位都有埋，目測都有成7000呎咁大！一齊睇下有咩好食啦！ 餐廳內單單係啤酒已經有50種，仲未計cocktail同其他酒類選擇！實有種酒啱你啦，唔知有無人成功挑戰晒佢咁多種酒呢？ 嚟到想飲酒配返份小食，可以試下，個樣夠晒得意趣緻！用巴馬火腿卷住無花果，食落既有火腿鹹香，又有無花果嘅鮮甜。上面嘅醬係特製嘅蒜蓉沙律醬，味道好特別，啱晒飲酒果陣食。 話明係美國菜又點可以唔食Burger呢？牛肉帶有炭燒香味，牛肉味濃郁又多汁，入面仲夾住勁多配料，好似煙肉、芝士同portobello蘑菇，食落口感超級豐富！跟住個漢堡仲會有埋一份厚切薯條，啖啖薯肉夠晒香口又豐富！ 呢個極黑毛豬煮到大約7成熟，食落鮮嫩又有濃香豬肉味。加埋香草、茄汁同芝士，真係好惹味呀！如果大家怕佢唔夠熟，仲可以落單嘅時候講明要全熟，都一樣好食！ 手搓粉形狀夠晒可愛，細細條好似螺絲仔咁，扭紋形狀可以輕易沾滿濃香醬汁，食落啖啖都係菇同粉嘅完美結合，就算唔係素食者都會愛上！

Bold意思係粗體，Italic就解斜體，當呢兩樣野結合，可能就好似觀塘駱駝漆大廈嘅Bold Italic咁，帶比你別具一格嘅創新感覺。有別於其他餐廳以統一風格視人，佢地以熱帶叢林配城市霓虹燈，舒適又帶點狂野嘅風格帶你出走庸庸碌碌、日日如是嘅平凡人世界，去一趟不可思議嘅奇幻旅程。呢度嘅套餐有餐湯、多士同飲品，主菜仲有好多選擇。其中仲有，鴕鳥肉相信都比較少見。其實鴕鳥肉好有營養㗎！佢除咗低脂肪、低熱量、低膽固醇之外，仲高蛋白、高鐵質、高鋅，號稱「最健康紅肉」。食落甘香瀰漫喺口腔，配上特製燒汁，帶少少孜然嘅味道，肉香更加濃郁！ 另一個套餐主菜就啱晒鍾意食魚嘅朋友仔啦！比目魚肉實得嚟帶香濃鮮味同胡椒香氣，細意品嚐仲有少少甜味。加埋有煎過嘅意粉做底，夠晒特別，驚喜得嚟唔怕食唔飽啦。 大大舊棉花糖出動，就知道又係會令少女心爆發嘅甜品時間啦！，將熱咖啡倒入棉花糖入面，即刻穿咗個大咕窿。小編鍾意整到佢融化之後撈埋棉花糖同雪糕一齊食，口感柔滑又夠甜絲絲。

話咁快就已經開始熱啦，呢個時候最好就係食返啲雪糕雪條消消暑！位於中環天星碼頭嘅雪糕店，英文解作「冰屋」，就咁聽落已經覺得夠晒涼浸浸，加埋佢喺碼頭，更加覺得份外寫意。原來店主選擇喺度開舖係因為懷念細個搭船嘅感覺，喺度望住一家大細、各式各樣嘅人潮往來，開心享受生活就更加開心！喺呢度開雪糕店，不時受住自己嘅旅行經驗或者食材嘅啟發轉換口味，就可以令大家行過路過更添樂趣同埋加添開心回憶啦！ 童年回憶幾時都想留住，今次小編即刻試下加。個雪糕帶少少麥芽味，上面仲有麥提莎碎，感覺好熟悉。童年回憶又點止一樣，都係其中一個點晴推介。雪白嘅顏色，白兔糖甜絲絲嘅味道，幾時都一樣咁令人滿足！香濃士多啤梨感覺好fresh，又唔係似假味士多啤梨，入口味道帶少少奶味，好似真係飲緊奶昔咁！

西貢比人嘅感覺就係一個好好玩好好hea嘅地方，星期六、日入去行一轉夠晒梳乎，但係帶埋小朋友同狗仔出街有時都幾麻煩。喺度開業已經21年，出面對住公園可以比寵物同小朋友玩，食物又標榜健康，Family Day去就啱晒啦。 餐廳室內裝修雅致舒適，地方算大幾有空間感，啱晒一家大細嚟到，小朋友坐唔定都唔怕郁下都撞到人。 如果鍾意食香辣惹味Pizza，呢個就啱晒你啦！上面有少少辣嘅雞，加埋焗過嘅薯仔、蘑菇、酸忌廉同甜椒，食落辣得嚟又夠晒惹味香濃，Pizza係人手即刻拉即刻整，薄得嚟好酥脆，鍾意食薄Pizza一定要試。 想食得輕盈啲，呢個就啱晒你啦。多士烤到好香脆，大量芝士加埋牛油果原隻切粒，食落啖啖都好柔滑又足料，再加埋雞肉口感嫩滑，味道更多層次。 集合多種superfood夠晒健康，又帶少少地中海風味同印度風味嘅入面有烚蛋、halloumi芝士、Kale Quinoa、Hummus同牛油果。食落味道清清地，唔會落好重味，啱晒注重健康嘅朋友仔去試下。

九龍城有一間，打正旗號專賣越南麵包，Burger大家就食得多啦，食落酸甜微辣滋味、層次感豐富嘅香脆越南麵包喺香港唔算常見，嚟到又點可以唔試下越南麵包風味呢！  室內裝潢走自然柔和路線，大家可以坐低慢慢歎，店主話佢開店原因都係因為好鍾意越南菜，煮得好開心，同時都希望大家嚟到可以開開心心食返餐。 嚟到又點可以唔食佢地嘅生招牌越南麵包呢？呢個用越式煮法去整，用椰青水去慢煮48個鐘之後先至再加焦糖煎一煎上色，食落舊肉腍得嚟好香，再加埋青瓜、芫茜、自家製牛油同秘製醬汁同酸辣汁，真係好惹味！加上越南麵包特式夠晒鬆脆，食呢個包酸辣之中又帶啲啲甜味，層次真係好豐富！ 脆炸雞翼幾時都咁給力，引死人！呢度嘅外皮唔止超級酥脆，蒜香味道仲爆晒燈，未拎到上檯已經聞到蒜香味已經超級香濃！雞肉仲保持到肉汁同口感鮮嫩，食落好入味，有陣陣香茅味道！ 提起越南咖啡總令人諗起滴漏咖啡，呢度當然都有提供比大家解解越南癮！呢杯咖啡香味濃郁醇厚，略帶苦澀回甘，大家嚟到一定要試試。