老友啱啱去完旅曼谷旅行，所以，專登約出嚟食飯傾吓旅行嘢，等佢分享吓旅行點滴，簡簡單單搵咗佢公司附近嘅一間主打小鍋米線嘅小店「雲香園」，睇返往日食評原來無食米線都竟然成年幾有多。小店地方唔大，6張四人枱一眼睇晒，裝修簡單樸實。整晚流轉好快，一枱客走，就一枱客入，亦有唔少外賣單。餐牌一版印晒所有食物，包括各款小鍋米線、配料、小食及飲品。晌鋪面有寫到湯底喺每日新鮮熬煮6個鐘，一陣間當然要試真啲啦。店家採用二維碼落單，喺依家嚟講唔係咩特別事 ，但佢嘅介面就特別多選項，做得都幾細緻，好似米線可以揀爽啲、淋啲、走蔥呀、走芽菜呀……等等選項。美利奶茶王 +$7、凍奶茶 +$8
聽個名好似好勁，詢問之下原來喺老闆自己走去學沖港式奶茶，真喺誠意可加，小弟甚少晌茶記以外嘅餐廳飲奶茶，今次就一於試試佢。茶底確喺唔錯，都算幾芳香馥郁，而口感嘅滑度個人覺得仲有啲提升嘅空間，但已經算喺幾唔錯。涼拌墨魚頭 $47
呢款涼拌小食真喺勁推介，話就話喺墨魚頭，其實仲有唔少墨魚鬚，堆到滿滿成座山咁，一啲都無手緊，份量十足。最緊要喺啲墨魚咬落好爽口 ，彈牙得嚟又有韌勁，有嚼頭，食落又涼浸浸，加上滿滿嘅蒜香，帶微微酸，好醒胃。牛腩小窩米線 $48
小弟今次就專一啲，只喺揀個牛腩小鍋米線，點餐時點餐介面已標明有齊芽菜、酸菜、韮菜、蔥、芫荽， 由於揀咗清湯底，所以就會少咗啲辣豬肉碎，不過加埋大大件牛腩其實都已經好足夠。講返啲牛腩，炆得好鬆化好入味，而啲米線 滑溜爽身，就算清湯都一樣好唔錯，加埋多種配菜，確喺好食又飽肚。雲香園米線 $64
老友一向大食又多心，揀呢個招牌嘅雲香園米線就最啱佢喇，因為一碗裏面有好多配料，包括台灣腸、冬菇、雞絲、雞翼、魚春卷、螺旋草、腐竹、芽菜、酸菜、肉碎、韮菜、蔥同芫荽，夠晒大堆頭，非常之豐富。雖然只揀酸湯，但佢話飲落好酸香開胃，仲有就喺啲餸料多到好似食極都食唔完，味道亦好唔錯。無論米線，抑或餸料，都好足份量，整體味道唔錯，阿姐又好好禮貌，眼見張張4人枱都喺坐2、3人，但阿姐都無話逼啲人坐埋一邊等人搭枱，用盡每個位，小店嚟講好難得。所以，我哋都無謂掗住個位，搵個地方飲杯嘢再傾。

近排老婆辛苦多嘢搞，所以，趁開心星期五就費事煮，做一晚「無飯夫妻」出街食，因為唔喺咩慶祝，就無上啲大餐廳，不過，都想食好少少，就算茶記都搵間有水準嘅，故此就過嚟「雪山冰廳」，因為知道佢哋有好多蒸魚選擇，呢樣真喺啱晒佢。對比上一次嚟已新裝修過，不過，對上一次其實已經喺5年前嘅事，哈哈！今次再嚟，感覺舒服好多，除咗裝潢較新簇，間隔比之前好，燈火夠光猛。一如大多數嘅茶記，調味料、餐具、餐紙早已放齊晌枱面或枱側抽櫃，阿姐亦好醒目，嚟兩杯熱水俾客人洗洗刀叉筷子，而且，都好有禮貌。睇到餐具排列整齊，又夠充足，某程度都睇到啲管理幾唔錯。兩大本餐牌，食物款式包羅萬有，亦喺茶記嘅特色。餐牌過咗膠面，影出嚟有啲反光，好彩喺收銀旁有啲郵寄單張攞，掃描出嚟俾大家參考就一目了然。另外，喺牆上仲寫咗一系列是日鮮魚，有䱽魚、紅鮪、盲鰽、黃花及班仔。唔喺咁多茶記會提供咁多魚鮮菜式，當然要試吓佢哋啦。我哋就睇啱個「滋潤燉湯二人套餐」，因為既有燉湯飲，又可以揀蒸魚鮮，而另一款小菜又可以晌季節小菜嗰度揀。個餐本身就唔包飲品嘅，不過，但就有加配優惠。滋潤燉湯 目測所見，好多客人都會揀燉湯飲，果然真材實料，撈一撈就見真章，而是晚燉湯喺淮山杞子椰肉雞腳燉赤肉，湯色濃而不濁，好清澈，入口清甜滋潤，非常好飲。香煎黑松露蓮藕餅 小菜揀咗藕餅，因為老婆都幾鍾意食蓮藕，同埋呢類菜式平時我哋都少搞。一客有成7件，仲要件件有番咁上下大件同厚身，煎得甘香唔油，咬落口感鬆化，裡面有唔少蓮藕粒粒，多咗一份爽脆口感，而陣陣黑松露嘅香味，亦令啲藕餅嘅食味錦上添花。豉汁煎盲鰽 落單時，侍應都說明蒸魚鮮需要等15-20分鐘，不過，最後都比我哋預期嘅時間快好多，同埋真喺好多人都有嗌蒸魚，未夠8:00pm已經聽到廚房話得番兩、三條。碟煎盲曹嚟到真喺有啲喜出望外，因為好大條，而蒸嘅火喉啱啱好，啲肉無黐骨，非常之嫩滑，又有魚嘅鮮甜味，加上豉汁蒸，令魚鮮味更突出，啲豉汁又可以撈飯，一舉兩得。港式茶走紅豆冰+$15、熱檸水 +$6 小弟一向都鍾意晌茶記飲杯奶茶，而老婆就鍾意食紅豆冰嘅紅豆，所以嗌呢杯茶走紅豆冰就滿足到大家。其實奶茶紅豆冰都唔喺第一次飲，不過呢度刻意寫明喺港式茶走，咁你就明白佢喺落煉奶，而非花奶。紅豆嘅份量都唔少，口感又綿又清甜，奶茶嘅茶底幾芳香醇厚，入口蠻順滑，唔錯。整體嚟講，環境舒服，啲阿姐招呼好好，又無話催你走，再者，啲嘢食得吖嘛，啱晒口味，無論燉湯，抑或小菜，以及飲品，都無咩挑剔位，食得稱心，十二分滿意呀！

同個老死傾開偈，原本佢都未嚟過觀塘啲廠廈食私房菜，咁就啱喇，難得三人行就一於帶佢哋嚟試吓「御膳」。因為食過好幾次，出品高質，水準穩定，永無失望，所以先夠膽推薦俾大家。仲有就喺貪佢價位唔算高，亦都做得有特色。 一出電梯對正就喺餐廳，老友嘅第一個印象就喺別有洞天嘅感覺，估唔到廠廈有啲咁類型餐廳，帶少少神秘感。而推門內進，地方唔大，夾夾埋埋都喺6、7張枱左右，裝修簡約，光猛整潔，有別一般大酒樓、大酒家嘅奢華，賣嘅喺服務同食物質素。除咗散點，仲有好多款套餐，2-12人餐都有，如果懶諗，就索性俾個「筆直」店家等佢幫你度。冬瓜瑤柱海鮮羹
廣東人都喺喜歡飲湯先，所以，就先上呢個海鮮羹，估唔到我哋就只喺3個人，但份量上就俾到一大湯碗，夠每人分到兩整大碗。最正喺湯頭非常之清甜，口感綿密柔滑，加上落料一啲都無手緊，裡面有好多鮮蝦仁粒、帶子粒、冬瓜絲及大量乾瑤柱，所以，鹹鮮味十足，非常之好飲！玻璃脆皮乳鴿
喺店家近嚟嘅招牌菜之一，即叫即做，師傅話推出嚟喺省一省招牌。先講外觀，炸得好靚仔，色澤非常均勻亮麗，由於新鮮炸起，咬落熱焫焫，薄薄嘅外皮夠晒酥脆，肉質就非常之嫩滑細緻，卻好有肉汁，無論用料，抑或烹煮手勢都好有水準。香煎花龍蝦
好多時食龍蝦都喺上湯焗、芝士焗或蒜蓉蒸，但今次就香煎，簡單得嚟都考功夫。由於龍蝦已斬件，咁比較易分，煎得色澤金黃，啲肉一撩就起，成大大嚿肉放入口，不知幾爽，亮點喺蝦肉彈牙到不得了，又極有蝦鮮味，加點點豉油王去煎，更有提鮮之效。墊底嘅脆麵都唔好錯過，卜卜脆，過吓口癮。白胡椒爆炒南非鮑魚
繼續又喺海鮮菜式，再嚟喺南非鮑魚，一上枱就散發出濃濃白胡椒香，鮑魚爆炒之後，好有鑊氣，口感軟腍得嚟仍保持一份柔韌感，雖然白胡椒味比較搶，但不失鮑魚嘅鮮甜味。溫馨提示，如果唔食得太辣嘅朋友，就事先向侍應講聲「少辣」，等師傅唔好太重手。極黑豬叉燒
燒烤嘢一向梗喺即燒即食就最好架啦，呢度嘅叉燒賣點就喺即燒，加上採用西班牙黑毛豬，夠誠意又用料正。出嚟嘅成品真喺寧舍唔同，叉燒肉質極之鬆化細嫩，脂香中又滲出少少酒香，加埋少少燶邊位，老死都大讚正呀喂！上湯浸春菜
春菜唔好話食，聽都喺印象中第一次，咩喺「春菜」，個樣同個口感都有少少似芥菜，但質感比較嫩啲；又似似哋菜心，有嗰份清甜味，都幾特別，加上吸滿上湯，食起嚟更為鮮味。師傅話唔喺成日有靚春菜，出一輪又可能無咗。極黑豬叉燒揚州炒飯
同你講揚州炒飯就梗喺無咩特別啦，但加咗上述嘅極黑豬叉燒粒，仲有新鮮蝦仁，立時升級晒啦。的確個炒飯炒得好有水準，一來飯粒分明，二來唔好炒得好油，入口既爽身，又香口、夠鑊氣，再者，飯內混有好多叉燒、蝦仁、蛋絲，口感十分豐富。仲有，份量多，又喺每人分到兩大碗，食完真喺飽晒。 抹茶奶凍
最後餐廳仲會奉送甜品，等呢餐有個甜美作結。是次甜品喺抹茶奶凍，做得唔錯，好有抹茶嘅清幽香味，個口感就做得挺身，但又夠軟滑。都話佢哋保持到水準，時隔5年再嚟，啲嘢都無令人失望。連埋酒水都喺每人四百多少少，招呼熨貼，上菜有序，速度又啱啱好，更唔會話要幾時交枱，等客人慢慢食，慢慢傾。仲有免開瓶費、免切餅費、又無加一，好啱一大班老友嚟搞吓大聚會。

趁假期無乜細藝，約咗老死「洪哥」行山，因為得我哋兩個，所以點行都得，就晌美孚出發，經中山台上馬騮山，再駁住奕信徑行到去城門，再落下城門水塘直剷到大圍，我哋都算行得快，唔使3個半鐘。而去到大圍就喺佢嘅主場，就帶我嚟到「金城茶餐廳」食佢嘅招牌嘢。餐廳喺典型茶幾格局，右邊一般卡位，中間細圓枱，左邊仲有少少二人台，整體嚟講，一個字：「逼」，同埋招呼嘛嘛，咁嚟得茶記就預咗，不過，覺得唔需要做盡每一張枱嘅客量囉。例子一：有兩父子入嚟時剛好坐咗左側二人枱，其實好正路，不過，疑似「老闆」嘅男士就叫佢哋調去中間嘅細圓枱同人搭枱，話嗰啲二人枱喺俾啲啲單身客搭枱用；例子二：就喺有個後生仔一個人嚟食，睇住佢被個「老闆」調咗兩次位，要注明喺個男仔喺食到中途嘅。我覺得啲客嘅流轉算喺超快，好快轉頭又有啲吉枱，其實無必要做到咁。所以，服務一欄，真喺一星都唔想俾架。你見張張枱面都有塊膠板棟住，唔喺因為衛生問題，就喺上文所講方便「叫」人搭枱，而餐具、調味料放晒上枱，啲枱又好細張，所以，真喺擺個碟頭飯加啲嘢飲就已經無乜位。餐牌已貼晒晌門口，入去之前都已經睇定食乜嘢，老友就話佢哋嘅生煎肉餅飯喺招牌，小弟當然試下啦；而老友就揀快餐，抵啲呀嘛！不過落單時又喺呢位疑似「老闆」，啲態度特別差，講多句或諗多陣，已好似要殺人父母咁，有時見其他客嘅表情，似有種無奈感。蜜椒豬扒飯 $57 快餐本應有3個選擇，不過，依家得番兩款，雖然佢哋嘅服務真喺超麻麻，但喺食物嘅質素就一啲都唔失禮，好似呢個豬扒飯，睇相就見豬扒份量超多，而且，煎得靚仔，加上以蜜糖黑椒調味，食起嚟非常惹味，小弟都試咗嚿，確喺幾正。生煎肉餅飯 $64 大大件肉餅，又厚身，冚晒啲飯，喺幾有睇頭，加上底面都經過煎香，望上去頗為吸引。食落個肉餅口感鬆化，而且，感覺肥豬肉唔多，加上煎過，一口咬落去嘅時候有少少焦香嘅脆口感，但喺你話喺咪好驚為天日，咁又未至於，個人覺得只可以講喺去到值得一試嘅程度。凍檸茶 +$3 平常嚟茶記就梗喺揀熱奶茶啦，今日真喺行到身水身汗，加上朝早已經飲咗杯熱奶茶，所以，整番杯凍檸茶解吓暑熱，爽一爽吓先。不過，啲冰落得超多，啜幾啖已經差唔多飲晒，味道方面不過不失，茶味唔算好濃，俾得三片檸檬都喺差唔多啦。上文都講過，佢哋會做盡每一枱客嘅生意，所以，你一食完指定動作喺清枱、執走碗碟，但絕對唔會好似出面一啲稍為好嘅餐廳侍應咁，執完嘢之後會同你講慢慢坐。嘢食就唔錯，但服務喺趕客型，定價亦比一般茶記貴少少，所以，拉上補下，整體評分就只好俾個中等。

小弟本身都幾鍾意食星馬菜，所以，以菜系而言，星馬菜確喺相對食得多。而呢一間「蘇山雞飯」長沙灣分店好耐之前都曾經嚟過，無論質素、價位都好啱心水，趁今晚無飯開就約咗住晌附近嘅表哥落嚟聚一聚，食餐星馬菜。環境就唔太多講，因為上次食評都有交代，簡單而言，地方夠大（分左右兩邊），地磚、裝修都帶點馬拉懷舊茶室風，啲卡位又寧舍大張闊落，舒服好坐。簡單嘅調味料、餐紙及餐具放晌枱邊，而呢度都喺用二維碼落單，合介面都易用，相信大家都熟晒點搞，不過，如果加配咖央多士一環可以加多欄「後上」就更貼心，唔使另外再同侍應講。由於二維碼落單，所以，都無問佢哋拎餐牌睇，好在臨走時見收銀旁有啲外賣單張拎，加上時隔年半，價錢都有所轉變（睇落無乜太大加價），掃瞄晒出嚟俾大家參考一吓。菜式嘅選擇由午餐、下午茶、招牌雞飯、推介、湯粉、蔬菜、小食、特色飲品到甜品，都充滿星馬風味，又有多種加配優惠，仲要無加一添，唔怪得咁多街坊幫襯。黑白雞飯 $93 第一次去長沙灣店就食咗招牌菜「獅城芽菜走地雞飯」，第二次去太子店就試新嘢「牛車水醬油雞飯」，今次嚟見有款「黑白」，啱晒啦，一次過俾表哥試晒兩款招牌雞，仲配上雞雜清湯、雞油飯。一整盤套餐送上嚟，賣相吸引。個湯幾清甜，裡面有啲冬瓜同雞腎之類，味道唔錯；而個雞油飯有別平常所見，比較深色，上次已問過店員，知道煮雞時加入啲日本花菇、元貝、多種香料增味，加埋啲雞油、斑蘭汁去煲個飯，自然色香味全。先試「白雞」，食落雞皮好爽，皮下脂肪又少，啲肉嫩滑鮮味，去晒骨，啖啖肉；試埋「黑雞」，似似哋豉油雞，濃郁得嚟帶點甜味，同樣皮爽肉嫩。佐食嘅3款醬汁：薑蓉、秘製辣醬、黑醬油，夠晒傳統、地道。巴東牛肉配江魚椰漿飯 $85 印象中都好耐無食過巴東牛肉，所以，呢個我就想試一試，碟飯仲配咗隻滷蛋同好多花生粒、江魚仔，而個椰漿飯加咗班蘭汁去煮，一身青綠，不過，班蘭本身嘅味道唔強，煮出嚟嘅飯都唔會話食到好大陣班蘭味，但勝在賣相吸晴，最緊要喺飯粒分明，入口軟熟。至於「黑掹掹」嘅巴東牛肉，咬落極之鬆化，除肉香，仲滲出複雜嘅香料味，再帶少許辣勁，夠惹味，確喺有質素。鹹魚蓉怡保芽菜 +$23 加配咗一碟菜，之前試過「參巴醬通菜」，今次就介紹表哥試試怡保芽菜。大大碗幾足份量，啲怡保芽菜肥嘟嘟，多汁爽脆，加上鹹魚蓉自然添幾份鹹香惹味感，不過，個人嚟講，再加多啲就仲好。冰爽砂拉越菠蘿冰 $48 小弟向來都鐘意飲菠蘿冰，晌網上見到呢個「菠蘿冰」就更加想試，單喺原個菠蘿咁上，仲加多一大片菠蘿圈，已經贏晒焦點，無得輸。有別茶記嘅菠蘿冰，佢實際喺沙冰嚟，打得細滑，飲落唔會有碎冰感，冰度啱啱好，無過冰嘅問題，每口都滿滿嘅菠蘿清甜香味，飲得出真材實料嚟。依家開始天氣熱番，更加「應節」，溫馨提示一吓，成個菠蘿沙冰份量堅多，一個人真喺飽到上頂，建議兩個人「些牙」就仲好。開心果椰子奶昔 $32 表哥就見呢個奶昔幾特別，就不如試試新嘢，顧名思義就喺開心果搭椰子做成嘅奶昔，一身青綠再加片薄薄葉，幾好睇。先講個口感，打得幼滑順口，雖然好青綠，不過就以椰子味突出啲，而開心果味隱隱約約，但整體嚟講確喺好唔錯。鮮油咖央多士 +$15 後上一客咖央多士，點都要嗌呢個俾表哥一試，一來有特色，二來「蘇山」做得有水準。單喺睇見片厚到不得了嘅牛油，已經有點震撼感，尤其依家啲菠蘿油塊鮮牛油越嚟越薄。多士烘得香脆，中間嘅咖央清甜，配上厚切鮮牛油，嗰份「脂」味唔喺人人識欣賞呢個邪惡之下嘅美味。三嚿水唔使，就飽到過晒心口，但最緊要喺啲嘢食得呀嘛，好食之餘份量又足，啲妹妹仔招呼又好，無話要受氣，所以，值得我再返兜又返兜！

趁天氣唔錯，同老婆行咗轉短山，美孚起步就咁上馬騮山，終點就落番石籬一帶，嚟到石籬商場，見到「銀龍冰室」仲有下午茶餐（供應到6:30pm），就食個早鳥晚飯先。唔好單睇門面，裡面原來都幾大，屈個彎仲有一大截用餐區，夠光猛，啲位又唔算逼，加上喺茶市尾，又未到晚飯時間，所以，客人唔多，感覺更靜侷。下午茶有好多選擇，豐儉由人，而因為我哋當晚餐咁食，所以，揀咗啲碟頭嘢。美極乾炒牛河 $49 雖然個菜式名冠以美極，但好老實講，食落我就真喺唔喺好覺有美極嗰種味道，但整體嚟講味道喺唔錯嘅，都幾有鑊氣，不過，第一就喺炒得比較油，第二牛肉嘅份量偏少，都喺大概3、5嚿左右，而且，無乜牛味。鮮茄焗豬扒意 $51 老婆嘅焗豬扒意粉睇外觀幾唔錯，初頭望落去仲以為啲意粉會有過腍嘅情況，但食落又OK喎，而啲豬扒都幾鬆化，但就較為薄身咗，至於個湯底
佢就話喺鮮茄，見唔到一嚿嚿嘅蕃茄肉之餘，少咗份鮮活感，感覺只喺用啲茄醬、茄膏打成。熱奶茶、熱檸水 嚟到茶記，嚟嚟去去都喺飲嗰啲啦，小弟嘅慣性就喺奶茶，今次呢杯色澤比較淡，其實入口茶味喺OK嘅，只喺覺得落奶多咗，奶味略嫌重咗少少。嘅感覺就喺質素普普通通，只喺地方相對好坐。唔介意行多少少落去和宜合道嗰邊，仲多個性小店茶記選擇，相信味道會仲好啲。

睇返啲食評原來對上一次同老友食火鍋已經喺上年8月嘅事，今晚趁高興同兩位相識數十載嘅死佬聚一聚，搞個死佬小飯局，選址就番大家方便嚟到尖沙咀樓上舖嘅「聚鳥亭」，聽個名以為喺居酒屋，其實主力喺做火鍋架，哈哈，不過，又滲入啲日式元素晌火鍋中，火鍋新秩序。餐廳呈L型，入到餐廳，都有少少和風感，主要喺牆上嘅彩繪，畫得真喺幾靚、幾吸精，而近廚房一邊有幾張梳化位，我就覺得特別好坐，夠晒舒服。呢度仲會有英超直播，就嚟到季尾，啲比賽會更加精彩，咁嚟呢度打邊爐就唔會錯過啲賽事，啱晒啲波友。最鬼馬嘅喺，店長話有時會僻餐廳一角放咗啲結他、鼓……，可以俾人即興街頭表演（Busking），有現場音樂伴食，夠晒過癮。餐廳無餐牌，採用二維碼落單，小弟就嘗試截圖俾大家睇睇餐牌有啲咩選擇。海鮮類、丸類、蔬菜類都有拼盤供選擇，所以，先向此埋手，再散點其他食材。食之前，先講講調味料，枱側一大個九宮格調味架，有芫荽、辣椒、葱粒、金蒜、辣椒油、芝麻醬、花生粒、腐乳及蒜蓉，再加3款醬汁：生抽、柚子汁、燒汁，頗有心思。日式鯛魚濃湯 $108
打邊爐湯底梗喺重點嚟，文初都講到呢度會滲入日式元素，3款湯底就明顯充分表現出嚟，包括：日式雞白湯、日式豬骨濃湯、日式鯛魚濃湯，店長話全部湯都喺真材實料即日新鮮熬製，可為誠意十足。前兩者食拉麵都曾試過，最後者個人覺得比較特別，湯色濃香不濁，先喺嚟試下啖湯，入口超鮮甜，魚味濃，裡面仲有啲好嫩滑嘅豆腐同埋健康嘅昆布，正呀喂。仲有，加湯就確喺加湯，而唔喺加水，所以，由頭到尾都保持濃郁，到最後用嚟加落啲拉麵度食，真喺一流。可樂、西柚梳打@$15
打邊爐唔少得汽水相伴，老友飲可樂，小弟就喜歡西柚梳打多啲，嗰一陣陣汽泡及涼快感，令打邊爐更添樂趣。海鮮拼盤 $198
拼盤包括大大隻嘅白蜆、大海蝦、南非鮑魚，睇落食材新鮮，不過，新唔新鮮一食就知，無得呃。先試啲白蜆，一來大大隻，夠厚肉，二來入口肥美鮮甜，帶少少海水鹹鮮味，又唔會有沙，高質；再試就大海蝦，同樣夠晒大隻，新鮮又彈牙，沾丁點醬油，鮮味更突出；輪到講件鮑魚，口感咬落有韌勁之餘，亦有彈牙感，鮑味鮮甜。雜丸拼盤 $128
一份拼盤共有8款食材，包括蟹籽丸、牛丸、炸魚蛋、芝士丸、貢丸、魚片頭魚、墨魚丸、魚皮餃，樣樣兩粒，我哋3個當然分唔勻，但每人都試到5、6樣。呢個部份唔算好特別，志在過吓口癮，相反，打邊爐無三幾款乜丸物丸，又好似感覺差少少咁。手打墨魚滑 $68
如果唔好丸類，唔叫都無妨，不過，呢個手打墨魚滑就點都要試吓，因為一客份量幾多，最重要喺個墨魚味突出，淥好嘅墨魚滑好彈牙，好食！ 白鱔 $88
除墨魚滑，另一推介喺啲白鱔片，啲白鱔片好有質素，望上去外觀好有光澤，入口好有魚鮮味，最正喺嗰一份爽脆感十足，沾點醬油提鮮，更加正。美國羊肩肉片 $78、黃喉 $58、澳洲M5和牛牛板腱 $108
跟住呢一輪就試吓啲肉類，最心水喺牛板腱同啲羊肩肉，難得兩位老友都鍾意食羊，再加一份黃喉，好和風嘅木盒裝上嚟，份外好睇。啲羊肩肉好嫩滑，羶味唔太重，相信一般人都食到；牛板腱採用澳洲M5和牛級數，自然差唔得去邊，輕灼就可以入口，口感軟腍，肉味香濃，卻又不失微微油香；而黃喉切開成一片片，灼過之後，口感非常之爽脆。蔬菜拼盤 $98
平衡吓咁就梗喺要食番多少少菜啦，一份蔬菜拼盤有齊粟米、白蘿蔔、金菇、冬菇、生菜、皇帝菜、娃娃菜，慳番諗嚟諗去嘅煩惱，而啲蔬菜都幾新鮮。新沾記水餃 $58、白鱔 $88
近尾聲，再追加多一份白鱔，上文分享咗就唔多講，另外，店長推介試吓新沾記水餃，果然有水準，水餃唔單止超大隻，包得豐滿，仲落足料，口感十足，好食。武藏野手打拉麵 $48
平常去到尾，都會嗌一客公仔麵或烏冬墊墊肚，今次嗌咗一份手打拉麵，賣相正頭好似平時去拉麵店食嘅拉麵咁樣，有齊鳴門卷、筍乾、木耳絲、蔥粒同紫菜，倒啲火鍋湯落去就食得，好有日本風味，而啲拉麵好爽口，真喺唔錯。今餐食得好稱心滿意，食得出湯底用心製作，食材新鮮，而招呼又好唔錯，店員手腳快，服務殷勤。

宮崎駿嘅動畫可以講喺陪伴我哋長大，我個人就較喜歡佢早期嘅作品，例如：「天空之城」、「風之谷」，至於「千與千尋」都覺得喺一齣幾特別嘅作品。最近偶然睇到食友晌「和道屋」嘅食評，見到竟然有個1:1嘅「無面男」坐鎮，加上餐廳嘅裝修和風感十足，絕對可以嚟一趟偽日本之旅美食篇。雖然餐廳設喺二樓，但地下入口嘅長長走廊，已經極具打卡感，「無面男」就坐咗喺度等大家同佢打卡，加上天花嘅燈籠，真喺話俾人聽去咗日本絕對會相信囉。拾級以上，都仲未正式入到餐廳，極具和風嘅彩繪，以及 一串串嘅燈籠，又喺另一個打卡位。走進餐廳嘅用餐區，地方都幾大，除了有多張散枱之外，最入面仲有三組仿榻榻米座位，較自成一角。一室木系嘅裝修，加上牆上貼咗唔少昭和年代嘅海報，配合埋昏暗嘅燈光，感覺更似去咗一趟日本，非常有氣氛。櫈底下都設有小布籃，等客人方便擺袋、背包，都喺少少貼心嘅安排。作為居酒屋定位，自然刺身、壽司、串燒、浜燒、燒物、石燒料理、鍋物、一品料理……等等一應俱全，餐牌一整大本圖文並茂，不過，有啲難影，所以，就無影出嚟俾大家參考。而我哋就試咗一個「海膽ｘ和牛二人前」（$1,288），一共有7道菜，有齊好多餐廳嘅招牌菜式，當中4款有海膽元素，夠晒膽「式」過人。此外，仲有幾好幾款套餐，例如：A4和牛壽喜燒、無限定特選套餐，計起嚟點都划算過散點嘅。芒果蟹籽沙律
雖然沙律面頭唧滿沙律醬，但都睇到有好多蟹米，沙律以青瓜絲、白蘿蔔絲及芒果作為組合，食起嚟非常清爽，加上啲芒果好清甜，確喺一道幾開胃嘅前菜。海膽甜蝦刺身杯
喺店家嘅新產品，單點要$198/杯，個套餐仲喺包兩杯，一人食晒一杯，唔使「些牙」。以雞尾酒杯盛載，一排排牡丹蝦整齊排列，加上海膽、黑魚籽，喺賣相上十分華麗，極具視覺效果，將3者一齊放入口，口感複雜，味道紛陳，並且散發出多重鮮味，實在好有驚喜。火炙和牛他他
初頭見過菜名寫住和牛「他他」，以為將和牛刴成蓉，原來都唔喺，喺切成厚厚一片片，再經火炙，面頭就灑咗啲金蒜、蔥粒同甘筍蓉，賣相精緻，而和牛火炙過，更富油香，食落口感嫩滑；底下嘅生洋蔥沾滿酸醋汁，正好用作間場，清清味蕾之效。海膽拖羅千層塔
千層塔顧名思義，就喺一層疊一層，亮點喺海膽多、拖羅蓉多、三文魚籽又多，令到色澤亮麗，未食已興奮呀！附有紫菜片，食法喺以紫菜夾住啲日本米及各款餡料好似手卷咁一齊食，紫菜好脆口，啲餡料晌口腔鮮味大爆發，加上以赤醋調好味嘅飯粒，口感黏糯，實在幸福感滿載。火灸和牛海膽卷
呢道菜嘅和牛就切得比較再薄身少少，方便捲起啲米飯，同樣輕輕火炙，令油脂香更突出，面頭放咗幾瓣海膽，將整件和牛海膽卷一啖過放入口
，慢慢細嚼，和牛嘅油香、肉味，與海膽嘅豐腴感，相互交織，真喺「脂」味無窮。海膽 X 黃金蟹膏烏冬
怕你唔夠飽，最尾嚟一小碗黃金烏冬，黃色嘅烏冬喺因為加入蟹膏去處，蟹膏汁掛滿晒每一條烏冬，單喺淨食烏冬已經好好味，再加上海膽嘅加持，令到啲烏冬更具奢華感。芝麻、綠茶雪糕
你都未食 當然係甜品時間 雖然簡簡單單嘅 芝麻雪糕綠茶雪糕，但啲雪糕嘅質素唔錯，除咗本身嘅芝麻同綠茶味夠突出之外，亦甚富奶香，質感挺身而軟滑。有朋友晌附近做嘢，所以，就專登問店員攞個午餐餐牌，睇睇午市定食喺點，睇落又幾划算喎，有機會再嚟試試先。
唔好睇啲菜式好似細細粉，食晒之後其實都幾飽吓，加上呢度環境幾舒服，滿滿日本風情，招呼又夠熨貼，店員有禮，令到整晚嘅用餐體驗都非常之好，值得推介。

老婆呢個禮拜有啲忙，所以，今晚唔好煮，做晚「無飯」夫婦，一於晌街食，走到過嚟灣仔先知「一起食堂」晌呢邊都有分店。大概一年前食過中環店，覺得價錢親民，食物質素又唔錯，所以，今晚翻兜，試試灣仔店。跟中環店差唔多，鋪面細細，其實裡面屬於深長型，不過，都喺屬於小店規模，但呢度有多咗少少卡位，同埋裝修比較雅緻少少，好似天花掛上特色嘅竹籮燈罩，牆上又有唔少台灣電影海報作點綴。餐牌底面兩頁，睇晒各種食物同飲品，包括麵類、飯類、小吃、台式飲品、甜品；另外，更有幾款季節限定新品，唯可惜無啲加配優惠。茉香綠茶、珍珠奶茶 @$28
老婆嘅茉香綠茶，味道好清幽，甜度就算要咗正常，都唔會有太甜嘅問題。小弟上一次就試咗愛玉鳳梨綠茶，其實味道都幾特別，不過，今次就回歸返台式嘅珍珠奶茶，奶茶做得唔錯，入口都幾醇厚，揀半糖就啱啱好，珍珠口感亦夠晒煙韌，最欣賞喺無冰，預早雪凍晒，所以，飲到尾奶茶嘅茶味不減。府城蝦卷 $32
佢哋嘅小食都幾多種類，同埋睇落有啲都幾特別，當中就揀咗呢一款府城蝦卷，如果無記錯府城就應應該喺指台南，因為小弟好多年前去過一次，有好幾間出名嘅小店，就喺主打賣蝦卷。蝦卷外層薄薄腐皮炸到好脆口，但入口唔油，口感唔似港式做嘅蝦膠咁爽彈，但喺蝦味非常鮮甜。日式清酒蜆烏龍麵 $79
餐廳本身有提供一款素嘅麵食，仲要配特濃豆乳湯底，其實都幾啱老婆，不過，難得見到有一款「日本清酒蜆烏龍麵」，佢話就仲啱佢口味。睇相就見有好多蜆，雖然細細隻，但肉質爽，富海水嘅鹹鮮味。而且，湯底清澈，滲出少少白酒香，真喺啱晒佢，此外，啲烏龍麵（即喺烏冬）口感煙韌，並且非常滑溜。花雕麻油雞肉麵 $92
上次就試咗個季節限定嘅冷烏冬拌柚子汁，但今次嘅季節限定未有心水，所以，揀返個招牌嘅「花雕麻油雞肉麵」。送上枱已經聞到陣陣麻油香，一小杯花雕酒另上，可以以個人喜好落多落少，小弟就梗係落晒成杯啦，立時個湯底變得更芳香，味道獨特；而雞卷做得有特色，捲起嚟夠紮實，咬落卻非常之嫩滑，配料仲有冬菇、時蔬、紅棗，不失店家推介嘅招牌菜或式。芋圓仙草凍 $42
最後就梗喺嚟番一份甜點作結啦，甜點就只有芋園圓仙草，啱我喎。一碗嘅份量唔少架，剛好喺夠晒兩個人分嚟食。除咗三色芋圓（地瓜、香芋、紫薯）、仙草，仲有啲紅豆，淋上花奶。芋圓咬口有韌勁，仙草非常滑溜，紅豆清甜又夠綿，可謂三全其美呀，更喺完滿結束。今次再食，雖然喺另一間分店，但無論小食、主食，還是飲品、甜點，都保持到水準。最緊要喺我同老婆都揀到啱食嘅，可謂皆大歡喜。此外，服務都幾唔錯，值得再幫襯多次。

好耐無寫過呢個系列喇，因為都無乜新嘢試到，嚟嚟去去都喺食番嗰幾間。最近晌屋企附近「盈暉臺」個商場就新開多一間「南豐餐廳」，所以新屎坑專登落嚟幫襯寫返篇早餐食評。其實呢個場越做越「dup」，尤其食肆，連大快活都做唔住，依家剩番一間茶記「雲石堡」。由於新開關係，店內嘅環境新簇，亦都比較光猛，以茶記而言，座位都算闊落，大部分都喺卡位，但有一邊擺放咗3張大圓枱，明顯喺主攻晚市時候嘅小炒，想做啲大枱客。我哋坐咗張4人枱，不過，有個設定好奇怪，佢明明有個側邊拉櫃用嚟放餐具，其實仲有空位，但唔明點解啲調味料又放咗喺枱面，掗住晒啲位。餐牌一大本有排影，好彩晌門口見啲外賣單張，一次過掃出嚟就大家睇得一清二楚，不過，都喺茶記標準，早餐、午餐、快餐、常餐、碟頭飯、小炒……等等。 早餐2. 特濃沙嗲牛肉公仔麵 $38 個早餐雖然寫住配炒蛋火腿及多士，其實炒蛋可以轉煎蛋，火腿又可以轉為餐肉或者煙肉……等等。好快就送上碗沙爹牛肉麵嚟，雖然只得4塊牛肉，但每塊都相對比較大，算係咁啦，食落啲沙嗲未幾香濃，牛肉就幾腍滑，公仔麵煮得唔錯；另外，啲煙肉煎得香口，同埋唔喺超多肥膏嘅平價貨色，炒蛋過熟，唔算話好滑，多士得嗰半片，同埋好似無烘過咁，呢個位就要扣扣啲分。早餐3. 雪菜肉絲湯米 $37 老婆嘅雪菜肉絲湯米就絕對唔合格，一來啲雪菜肉絲煮到好餬，成層層膠水嘅口感，二來肉絲真喺數得出有幾條，就喺得4條，反而唔明點解有好多肥膏粒，搞到老婆好似捉蝨乸咁夾返晒出嚟，所以，佢話呢間餐廳應該無下次。熱奶茶、熱杏霜 餐飲方面，杯奶茶睇落色澤幾OK，飲落茶底都還可以，有茶香得嚟但未叫好醇和，口感方面亦都未喺好滑；老婆就話佢嘅熱杏霜麻麻哋，味道淡咗啲，唔及上次喺「蕃茄18」飲嘅好。上文都提及過，呢個「盈暉臺」嘅商場都有少少死場咁，真喺唔知呢間「南豐餐廳」做得幾長。一向都話，一間餐廳最緊要食物做得好唔好，好先有多啲回頭客，呢個場已經好難有太多區外生客。食過今次之後，我就覺得麻麻哋，只有睇佢晚市做嘅小炒得唔得，如果有多少少晚市客就仲有得做！