銅鑼灣百樂以前同屋企人間唔中都會去食，尖沙咀嘅百樂小館就係第一次。 我想講香港食潮州嘢真係好方便，平時通常會去九龍城，如果唔係因為今日成班朋友聚會都好少會喺尖沙咀食潮州嘢。 佢哋嘅蟹棗，蝦棗，係絕對100分，炸口得啱啱好之餘唔會油淋淋，粒粒都好飽滿，最重要嘅係佢好足料，唔會好似其他潮州飯店咁樣軟林林！心食！原本想叫多份，但係我哋已經叫咗好多其他餸，搞到人哋想食多粒都冇機會！ 佢哋嘅燉湯好有驚喜，今日係蟲草花螺頭燉雞湯，直頭好飲過自己屋企煲，雞湯濃郁，冇味精，飲完唔會口乾。 重頭戲係潮州糯米炒肉蟹！ 我食左一隻大蟹鉗，始終身體唔係咁好，佢哋成班八婆食到嘴舐舐，隻蟹超大！係超大，糯米飯勁入味！明明要戒口，結果都食咗成碗糯米飯！ 唔記得咗佢叫乜嘢名，係炸芋絲餅？又係超好食，佢哋嘅炸嘢真係做得相當唔錯，五香粉唔會蓋過芋頭嘅鮮味，原本應該要share一人一半，我自己貪心食咗成塊！ 我想講，好戲在後頭！ 杏仁茶加芋泥！ 又係我嘅第一次！ 好食到想爆粗！ 杏仁茶，香滑，唔會太甜！ 重點係同啲芋泥一齊食！即係將成件事昇華咗！好似升左呢咁！成件事唔會太甜，口感柔滑！ 真係有少少對唔住最尾加單嘅反沙芋，雖然你都好好，但係杏仁茶加芋泥已經成為咗我嘅最愛！

西班牙炒飯就要喺西班牙餐廳食，咁waffle呢？唔通要去比利時餐廳食？ 話說呢，有日傾開計，有人喺上環番工，話呢度啲窩夫好好食，咁你無端端又唔會專登去食窩夫嘅。 咁啱今日呢，就真係有個人話好想食窩夫，咁好啦，原來佢呢度做嘅係麻薯窩夫。咁晚餐時段冇理由淨係食個窩夫，唔夠飽㗎嘛，咁我哋就叫咗蜜瓜火腿同埋西班牙海鮮炒飯。 個蜜瓜火腿係有驚喜嘅，火腿鹹鹹香香，配上清甜嘅蜜瓜，一定唔會錯，最驚喜係佢配上左蜜糖合桃，佢哋嘅味道好夾㗎！ 西班牙海鮮炒飯，大大盤，好抵食，有蝦有青口有蜆，飯底做得唔錯，煙煙銀銀，每一啖都索滿湯汁，雖然未至於最正宗，但係呢個價錢加上呢個質素性價比極高！ 終於等到個主角！ 果然係名不虛傳！ 麻薯窩夫，顧名思義，個麻薯裏面有窩夫，唔係唔係搞錯咗，係窩夫裏面有麻薯！ 我真係大鄉里出城，第一次食有麻薯喺裏面嘅窩夫！原來滿足感會雙倍！ 窩夫外層脆脆，但係唔會界口，呢樣好重要，外面脆裏面軟！ 配上唔同種類嘅雪糕同埋生果！仲有蜜糖，直頭係一百分！ 仲有，佢係超大份！如果兩個人食，真係要叫少一個主菜！ 淨係黎食窩夫都值得！

銅記食burger一定喺burgers room，由當年嘅加路連山道食到呢到，自問唔係忠心，總之想食個好嘅就要番黎呢度食。 早排做完手術未開工，心思思，好想落黎飲咖啡，落到黎，見到burger room，有啲餓，望下佢有冇咖啡，原來有，咁好啦。 真係好掙扎，而家胃口細左，又戒緊口，唉，唯有，唔食double decker啦。 Order左cappuccino，portobello cheese burger，fish finger因為好想食tartar sauce。 咖啡比想像中更加好，好濃，奶泡香，厚，亦都比想像中大杯。好滿足。 Burger水準依然，厚厚一塊patty，有肉汁，有肉味，有焦香，麵包脆，温暖，配菜新鮮，呢啲咪burger囉！不過一定要用刀叉食！實在太大個嘞。 舒舒服服~ 好味，心情好！

一早約咗去中環整啲嘢，朋友話要去呢個地方，我以為係靚靚嘅地方食下午茶，原來呢度係飲嘢嘅，整完野過到去先至知道原來係別有洞天。淨係搵個門口我都猶豫左幾分鐘，俾人笑到面都黃。咁好啦暫時戒緊酒嘅我，同威士忌冇緣份，睇吓佢嘅餐牌，我心諗有乜理由喺中環飲咖啡可以咁平，咁好啦一於叫杯咖啡睇睇先。 一個字，靚。環境好靚。 成個地方嘅環境好舒服，每台客都係細聲講大聲笑，氣氛輕鬆自在。有好多植物做裝飾，自然會令到人好想影相，同埋真係好多威士忌嘅選擇，鍾意飲番杯傾吓計，比起去酒吧酒吧，呢度會係更加舒服嘅選擇。雖然我冇飲酒，但係我睇過個餐牌，佢選擇多得來價錢亦都好親民。 我點嘅cappuccino絕對比好多咖啡店味道好好多，奶泡亦都打得好厚身，用靚靚嘅餐具裝俾你，入口相當柔滑，平時飲咖啡我好少落糖，係呢杯咖啡嘅味道已經相當平衡，絕對唔需要自己再加糖已經好好味！ 一路飲咖啡一路俾人笑，但係可能因為肚餓嘅關係，我10分鐘就K.O.左杯咖啡。 一路講一路講講到口都乾，所以再order左杯茶。 堅好飲！佢哋用嘅係有機茶葉。 我就揀返自己最鍾意嘅Berry味道，成個茶壺攞俾你，最奇怪嘅事通常飲呢啲茶自己都要再另外加啲糖先至夠味道，但係又唔使加糖都已經好夠味，我打開嗰蓋睇吓，原來裏面係加咗新鮮水果，唔怪得知！ 喺置地廣場想飲番杯終於有個好選擇！

臨時決定去睇返場戲，喺時代廣場搵嘢食，諗住求其喺戲院門口唔使走來走去，初頭以為佢會麻麻哋，點知原來有意外驚喜。 淨係睇佢個餐牌都睇咗三個字。直到對家發炆憎先至的起心肝落單。 最尾都係叫咗辣肉腸松露芝士豬扒包，原本想叫原味嗰個，因為驚佢好鹹，好彩有叫到呢個，因為佢個辣肉腸松露芝士醬真係做得好好食，辣肉腸味道又香辣，松露味唔會太過火，加埋芝士成醬又香又好味，豬扒好大塊，唔油，好林，Order嘅時候已經叫咗佢幫我地切開一半，諗住食起上嚟方便啲，結果都係因為佢大得滯，而我又唔肯用手食，結果都係要用一塊包食佢個肉醬，用另外一塊包食豬扒，10分滿足！ 令到我最驚喜嘅係，滋補藥膳牛肉湯米，事關我啱啱做完手術，成日都想食啲有湯嘅嘢，又係掙扎緊究竟叫雞定係叫牛肉，到最後因為唔想食骨，所以叫咗牛肉。個湯底清甜到不得了，配料有好多牛肉，蟲草花，同埋雪耳，基本上每一啖米粉都有料，個湯飲落好順口，藥材味唔會太濃，好似飲緊屋企啲湯咁。 又叫咗個二人拼盤，我就負責食乾邑葡國辣肉腸，燒烤意大利青瓜，松露芝士包，對家就負責食，魷魚酥沙律，香辣豬耳沙律，芝士馬介休球。其實我未食豬扒包之前已經食咗松露芝士包，因為佢塊麵包上面個醬汁真係好好食，意大利青瓜雖然同個拼盤好似冇乜關係，但係又係我嘅最愛，其實我哋嗌呢個拼盤就係因為想食佢嘅辣肉腸，呢個葡國嘅名菜，喺澳門出名嘅葡國餐廳食差唔多要$200一條，喺呢度食其實真係抵到爛！ 魷魚鬚個汁好香辣，我忍唔住偷食咗一條，芝士馬介休球我又食咗一舊，原來佢係將啲芝士入咗去個薯仔球入邊，呢個就係佢哋有驚喜嘅地方，因為佢哋啲芝士好似好多菜式都有用，但係又唔會覺得好膩。 佢個餐牌仲有好多好多我想食嘅嘢，兩個人真係冇可能叫，我都唔明白點解時代廣場會有咁樣抵件夾大食嘅餐廳！

從前在大圍的老店，原來在灣仔重生了，媽媽說她一早知道，我是昨天才發現。 一點都不便宜，當年的價格我就忘記了。 味道，不錯。 服務，很好。 因為是平日的關係，用網上預訂有折扣。八折。 買單嗰陣唔記得咗，提一提佢哋就即刻改返張單。要注意。 燒乳鴿，先叫咗一隻，味道唔錯嘅，未至於驚為天人，$78一隻，依家好多餐廳都要呢個價錢。三個人一隻唔夠喉，後尾再加左一隻。 炆伊面，非常好食。伊面唔會林啤啤，充滿細細粒嘅花膠，味道濃郁。 蝦餃，牛肉，馬拉糕，通通都好吃。

和兒子兩個人，一直都好想帶佢黎，趁暑假，終於成事。 做完手術唔食得生，無關係，熟食選擇一樣多，好味。 美國牛肉薄燒定食 $108 碎葱吞拿魚海膽飯 $138 前菜有沙律菜，醬茄子，配櫻花蝦味噌湯。 好耐冇試過午餐嚟，真係俾佢嘅份量嚇親，有乜理由咁嘅價錢比咁高質素同埋咁多份量？ 魚生飯我冇食所以我唔寫。 我嘅牛肉薄燒裏面塞滿左切碎嘅青蔥，炸過嘅蒜片 ，牛肉只係用鹽，胡椒調味，最重要係半碟嘅酸醋醬油，一份有八大舊！ 配埋碗白飯。 真係不得了！ 性價比，極高！

真係好耐未試過打邊爐放題，話說同阿哥食飯，我就話打邊爐，佢就話同同事最近食過呢一度，本身我都好掙扎，始終都覺得酒樓任食質素唔方好得去邊，佢話絕對冇問題，咁好啦。 唔知係咪因為太耐冇去過德興，定係因為太耐冇去過酒樓食任食火鍋，原來而家嘅質素係咁鬼好，我都已經唔記得任食幾多分鐘，但係佢完全冇吹我哋走，落單上菜速度都好快，重點係，飲品任飲，食物質素高。 湯底叫咗甘筍粟米椰子雞鍋，坦白講，淨係食個鍋底已經好足夠，成隻雞，真係成隻雞分開俾你！ 全晚令到我最開心嘅，就係佢哋嘅海蝦。 有冇諗過打邊爐都會有咁大隻咁新鮮咁爽口嘅新鮮海蝦，上到枱仲扎扎跳！我都唔記得自己叫咗幾多round！ 除咗有一部份食物可以用紙落單，另外有一部份食物係自助餐枱有得攞，最神奇嘅係佢有出前一丁，其實我一入去已經見到話一定要食，結果比啲蝦飽到完全食唔到。 最後，每人仲有一盒movenpick嘅雪糕。

今日放假，出去食啲嘢跟住買餸返屋企。 搬咗入黎咁耐都冇食過呢間炸魚薯條。 當我掙扎緊叫炸魚薯條，定係炸魚包配薯條，店員叫我考慮炸魚包薯條，因為今個星期特價只係賣$38，原價$48。 炸魚包舊炸魚同普通炸魚一模一樣，加$5仲可以要一罐可樂，不過我自己帶咗水所以冇加到。 等左唔使10分鐘就炸好，熱辣辣。 你唔好睇佢個包唔係好大，份量絕對足夠，炸魚冇一般雪藏魚嘅雪味，魚肉煙煙銀銀，唔會碎濕濕，調味啱啱好，炸粉唔會過厚，唔會戒嗔你個嘴，啱啱好，麵包似English muffin，加咗少少牛油芝士同埋白醬，正。成個包食落唔會乾，我都係食咗得一大半先至飲一啖水。 薯條先至出色，係粗薯條，配上自家調製嘅他他醬，真係好好食，不過太熱，要慢慢食。 下次返嚟叫麥樂雞

喺香港島食飯問題就係太多選擇，呢一間小店經過好多次一路都想來，就係唔知點解冇機會，今日真係咁啱咁橋係冇心理準備嘅情況底下就嚟咗呢度食飯。 以為佢好少選擇，點知比想像中多好多，原本諗住叫少啲，點知叫下叫下又叫多咗。 煎封芝麻吞拿魚 - 又係一個好艱難嘅選擇，最後都係因為驚肚痛冇叫到吞拿魚他他，呢一個做得啱啱好，加上佢個醬汁酸酸甜甜好開胃！ 西班牙黑毛豬紅酒汁 - 有啲後悔叫咗呢一個，因為佢嘅份量實在太多，冇諗過佢嘅份量咁抵食，同埋因為黑毛豬嘅關係，肉味比較濃，食完呢一份已經飽晒。 法國空運黑青口配薯條 - 最鍾意嘅唔係佢嘅黑青口，而係佢嘅粗薯條同埋醬汁，粗薯條可以飲到多啲汁，鍾意佢個醬汁清甜開胃！ 肉桂蘋果焦糖醬可麗餅 - 鍾意佢嘅餅皮有陣陣嘅麵粉香，佢唔係好趣口，但係好軟熟，加上焦糖醬同埋蘋果，簡直係加咗分！ 到最後都係忍唔住叫咗杯咖啡，飽到暈低左，最驚訝嘅係佢真係好抵食，以呢個價錢呢個質素，作為小眾聚會真係冇得頂。